BQO-da uıaly baılanys operatorlary 13,8 mln teńge aıyppul arqalady

ORAL. KAZINFORM – Batys Qazaqstan oblysynda 405 eldi meken bolsa, sonyń 335-i ınternetti paıdalanady.

BQO tsıfrlyq tehnologııalar basqarmasynyń basshysy Nurǵısa Qamashevtiń óńirlik kommýnıkatsııalar qyzmeti alańynda ótken brıfıngte málim etkenindeı, dybystyq qońyraýlar úshin uıaly baılanys 379 aýylda (93 paıyz) qamtamasyz etilgen. 

Nurǵısa Málikulynyń sózine qaraǵanda, baılanys sapasyn baqylaý baǵytynda óńiraralyq baılanys ınspektsııasy bıylǵy birinshi jartyjyldyqta jospardan tys 10 tekserý júrgizgen. Nátıjesinde baılanys operatorlaryna 13,8 mln teńge kóleminde aıyppul salyndy. 

- Uıaly baılanys ınfraqurylymyn damytý maqsatynda baılanys operatorlary ótken jyly 23 eldi mekende jańa bazalyq stantsııalar ornatty. Bıyl Bılaın jáne Ksell baılanys operatorlary jańa bazalyq stantsııalardy Oral, Aqsaı qalalary men 28 aýylda ornatyp, 71 eldi mekenniń qoldanystaǵy bazalyq stantsııalaryn jańartý jumystaryn josparlaǵan bolatyn. Kúni búginge deıin baılanys operatorlary Aqjaıyq aýdanynda Tegisjol, Báıterekte Chınarev, Kaztalovta Ábish, Qaratóbede Shalǵyn, Tasqalada Tasqala, Terektide Podstepnoe aýyly men «Syrym» jáne «Tasqala» avtomobıl ótkizý pýnktterine jańadan bazalyq stantsııalar ornatty, - dedi N.Qamashev.

Onyń aıtýynsha, sonymen qatar 33 eldi mekenniń qoldanystaǵy bazalyq stantsııalaryna 4G standartyna deıin jańartý jumystary júrgizildi.

Oǵan qosa óńirde ınternetke keń jolaqty qoljetimdilikti uıymdastyrý, «Qoljetimdi Internet» ulttyq jobasy aıasynda eldi mekenderdi talshyqty-optıkalyq baılanys jelisine qosý, respýblıkalyq avtojoldar boıynda baılanysty qamtamasyz etý baǵytynda josparly jumystar atqarylýda.

Eske sala keteıik, budan buryn Batys Qazaqstanda 413 eldi mekenniń 334-i ınternetke qosylǵanyn jazǵan edik.