BQO-da úı alýǵa «járdemdesip», aqsha alǵan basshy sottaldy
ORAL. QazAqparat - Jańaqala aýdandyq sotynyń 30 mamyrdaǵy úkimimen aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń burynǵy basshysy Nurlan Beıisov QR QK 177-baby 3-bólimi «g» tarmaǵyna (1997 jylǵy redaktsııadaǵy) sáıkes qyzmet babyn paıdalanyp, alaıaqtyq jasaǵany úshin aıypty dep tanylyp, múlkin tárkileýmen birge úsh jylǵa bas bostandyǵynan aıyrý jazasyn jalpy tártiptegi túzetý kolonııasynda óteýge sottaldy, dep habarlaıdy «QazAqparat» tilshisi.
BQO sotynyń baspasóz qyzmetinen túsken málimetke qaraǵanda, «Qazaqstan Respýblıkasy Táýelsizdiginiń 25 jyldyǵyna baılanysty raqymshylyq jasaý týraly» QR Zańynyń 4-baby 2-tarmaǵy negizinde jazany óteý merziminiń tórtten bir bóligi qysqartylyp, túpkilikti 2 jyl 3 aı bolyp belgilendi.
Sot talqysynda belgili bolǵanyndaı, N.Beıisov atalmysh qyzmetti atqara júrip, 2014 jylǵy qyrkúıekte K. degen azamattan basqa bireýdiń ıeligindegi úıde odan ári turý, sosyn jarııa etýge septesemin dep, 50 myń teńge alǵan. Bıylǵy aqpanda ýádesin oryndamaǵany úshin aqshasyn qaıtarýdy talap etken K-ǵa 10 myń teńge berip jatqan kezde N.Beıisov sybaılas jemqorlyqqa qarsy qyzmet qyzmetkerleriniń qolyna túsken.
Sot úkim shyǵarǵan kezde qylmystyń qoǵamdyq qaýpin, sottalýshynyń kinásin moıyndaǵanyn, asyraýynda eki balasy bar ekendigin eskerdi.
Sot úkimi zańdy kúshine engen joq.
