BQO-da úı alý kezeginde 32 myń adam tur

ASTANA. QazAqparat –Batys Qazaqstan oblysynda úı alý kezeginde 32 myń adam tur. Bul týraly Ortalyq kommýnıkatsııalar qyzmetinde ótken baspasóz máslıhatynda Batys Qazaqstan oblysynyń ákimi Narıman Tóreǵalıev aıtty, dep habarlaıdy QazAqparat tilshisi.

«Prezıdent Joldaýynda turǵyn-úıler men qala ınfraqurylymyn abattandyrý máselesin qolǵa alý kerektigin qadap aıtqan bolatyn. Bul óńirdegi eń ózekti máselelerdiń biri sanalady. Qazirgi tańda oblys boıynsha úı alý kezegine 32 myń azamat tirkeýde tur. 2023 jyly «Qýatty óńirler - eldi damýynyń draıveri» ulttyq jobasy aıasynda turǵyn úı qurylysyna jáne páterler satyp alýǵa 11,3 mlrd teńge bólinip, oblysta 15 kóppáterli turǵyn úı jáne aýyldyq eldi mekenderde 42 turǵyn úı, barlyǵy 2 377 páter qurylysy qarastyrylǵan. Jyl qorytyndysynda 30 turǵyn úıdi, ıaǵnı 893 páterdi paıdalanýǵa berýdi josparlap otyrmyz», - dedi BQO ákimi.

Onyń aıtýynsha, 7 kóppáterli turǵyn úıi Oral jáne Aqsaı qalalarynda, al aýyldyq eldi mekenderde 23 turǵyn úıdi paıdalanýǵa berý josparlanǵan.

«Oǵan qosa, halyqtyń áleýmettik jaǵynan álsiz toptaryna kommýnaldyq turǵyn úı qorynan turǵyn úı satyp alýǵa 1,7 mlrd teńge qarastyrylyp, Oral qalasy boıynsha 178 páter satyp alý kózdelgen. Nátıjesinde, úı kezeginde turǵan azamattarǵa 1 071 páter paıdalanýǵa beremiz», - dedi óńir basshysy.