BQO-da úshinshi toqsanda 400-ge jýyq oqýshydan koronavırýs anyqtaldy

BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngide málim etkenindeı, sonyń 226-sy dástúrli túrde, 167-si qashyqtan oqıdy.

Nurlybek Ermekulynyń sózine qaraǵanda, 11-25 naýryz aralyǵynda qala men aýdandar bas memlekettik sanıtar dárigerleriniń qaýlysyna sáıkes 8 mektepte 15 synyp, oǵan qosa Tasqala aýdanynda 1 mektep karantınge jabyldy.

Jalpy, oqý jyly bastalǵannan beri 608 shákirtten (324-i dástúrli túrde, 284-i qashyqtan bilim alady) indet tabyldy.

Oblysta 1 qańtar men 25 naýryz aralyǵynda 5376 adamnyń aýyrǵany tirkeldi. Sonyń ishinde qańtarda – 1837, aqpanda – 1950, naýryzda 1589 adam koronavırýs juqtyrdy.

Naýryz aıynda naýqastarmen qarym-qatynasta bolǵan 3319 adam medıtsınalyq baqylaýǵa alyndy.

Sońǵy aptada (19-25 naýryz) aldyńǵy aptamen salystyrǵanda, aýrý juqtyrý deńgeıi 20,8 paıyzǵa (411-den 519-ǵa) ósken.

«Osy aıda dertke shaldyqqandardyń 570-i nemese 35,8 paıyzy – jumys isteıtinder, 423-i nemese 26,6 paıyzy – zeınetkerler, 286-sy nemese 17,9 paıyzy – jumyssyzdar, 134-i nemese 8,4 paıyzy – oqýshylar, 52-si nemese 3,2 paıyzy – medıtsına qyzmetkerleri, 45-i nemese 2,8 paıyzy – muǵalimder», dedi N.Mustaev.

Sondaı-aq naýryzda memlekettik shekaradan ótken 25032 adamnyń 5581-i – jolaýshylar. Anyqtamasyz ótken 621 jolaýshynyń ishinen bir adamnan koronavırýs tabyldy. Halyqaralyq júk tasymalymen aınalysatyn 12637 júrgizýshiniń 3264-inde anyqtama bolǵan joq. Bulardyń úsheýinde indet bar ekeni belgili boldy.

Óńirde monıtorıngtik toptar naýryzda 442 reıd júrgizip, 4793 nysandy qamtydy. Úsh nysanda buzýshylyq anyqtaldy. 18 hattama toltyrylyp, 787590 teńge aıyppul salyndy.

Eske sala keteıik, budan buryn Batys Qazaqstanda sońǵy tórt kúnde 300-den astam adamnyń koronavırýs juqtyrǵanyn jazǵan bolatynbyz.