BQO-da úsh jylda 620 myń gektar jer memleketke qaıtaryldy

ASTANA. KAZINFORM – Batys Qazaqstan oblysynda paıdalanylmaı jatqan jerlerdi memleketke qaıtarý esebinen jaıylym kólemi artty. Bul týraly oblys ákimi Narıman Tóreǵalıev málim etti.

«Memleket basshysy jerdi tıimdi paıdalaný máselesine aıryqsha nazar aýdaryp, paıdalanylmaı jatqan jer memleketke qaıtarý tapsyrmasyn júktedi. Búginde aýyl turǵyndaryn mazalaıtyn suraqtardyń biri ol jaıylym tapshylyǵy. Jergilikti atqarýshy organdar tarapynan, osy baǵytta júıeli jumystar kúndelikti túrde júrgizilýde. Sońǵy 3 jylda maqsatyna saı paıdalanylmaı otyrǵan 620 myń gektar aýyl sharýashylyǵy jerleri memleket menshigine qaıtaryldy», - dedi Narıman Tóreǵalıev Ortalyq kommýnıkatsııalar qyzmeti alańynda ótken baspasóz máslıhatynda. 

Ákimniń sózinshe, 458 myń gektarǵa jýyq jer ýchaskeleri rezervke qoıyldy, 140 myń gektar jer ýchaskeleri eldi meken jerler sanatyna aýystyryldy, sonyń nátıjesinde jaıylymnyń jalpy kólemi 607 myń gektarǵa artty. 

«2022 jyldyń 1 qańtarda óńirdegi jaıylym jerler tapshylyǵy 339 myń gektardy qurasa, búginde bul kórsetkish 13 ese azaıyp, 25,0 myń gektarǵa deıin tómendedi», - deıdi ol.