BQO-da úsh jyl buryn ashylǵan mektep ǵımaraty qaıtadan jóndeýge jabyldy
ORAL. KAZINFORM – Batys Qazaqstan oblysy Terekti aýdany Magıstral jalpy orta bilim beretin mektebiniń ǵımaraty jóndeýge jabyldy.
Kazinform agenttigi budan buryn jazǵanyndaı, mektep ǵımaraty ótken jyly kúzde osyndaı kúıge tap bolyp, jóndeýge jabylǵan edi.
Jańa oqý jylynda oqýshylar qaıda bilim almaq, bul jóninde BQO bilim basqarmasyna arnaıy saýal joldanǵan edi.
Bilim basqarmasynan málim etkenindeı, Magıstralnyı aýylynda 108 oryndyq mektep ǵımaraty 2023 jyly jeltoqsanda paıdalanýǵa berilgen. Munda 100 oqýshy 22 synyp jıyntyǵynda bilim alady. 43 pedagog pen 12 tehnıkalyq qyzmetker jumys isteıdi.
Basqarmanyń málimetine qaraǵanda, 2024 jyldyń sońynan bastap ǵımarattyń ishki jaqtaýlarynda jaryqshaqtar paıda boldy. Jóndeý jumystary júrgizilgenine qaramastan, 2026 jyly qaıtadan tekserý barysynda jaryqshaqtardyń sany men kólemi kóbeıgeni anyqtaldy.
- Oqýshylar men qyzmetkerlerdiń qaýipsizdigin qamtamasyz etý maqsatynda ǵımaratta oqý úderisi ýaqytsha toqtatyldy. 20 oqýshy Poımadaǵy, qalǵan 80-i Aqsýat aýylyndaǵy mektepte bilim alatyn bolady. Olardy tasymaldaý uıymdastyrylady. Merdiger uıym anyqtaldy. Anyqtalǵan aqaýlardy tolyq joıý maqsatynda jóndeý jumystaryn osy aptada bastaý kózdelip otyr, - dep habarlady vedomstvodan.
Eske sala keteıik, budan buryn BQO-da jańadan salynǵan mektep ǵımaraty eki jyl ótpeı nelikten jabylǵanyn jazǵan edik.
