BQO-da úsh jasar balany qutqarǵan oqýshy medalmen marapattaldy
ORAL. QazAqparat - Qaztalov aýdany Ǵ.Begalıev atyndaǵy orta mekteptiń 7-synyp oqýshysy Nurdáýlet Aıbolatov «Sýǵa batqandardy qutqarǵany úshin» medalimen marapattaldy, dep habarlaıdy QazAqparat tilshisi.
Qutqarýshy kúnine oraı H.Bókeeva atyndaǵy oblystyq qazaq drama teatrynda ótken saltanatty sharada marapatty Nurdáýletke BQO TJ departamentiniń bastyǵy, general-maıor Jasulan Jumashev tabys etti.
Nurdáýlet Aıbolatov ata-anasymen Qoshankól aýylynda turady. Úıdegi úsh uldyń kenjesi. Nurdáýlet bıylǵy 5 mamyrda toǵanǵa batyp bara jatqan úsh jasar balany qutqaryp qalǵan edi.
«Nurdáýlet sabaqty úzdik oqıdy, sportpen aınalysady. Qoǵamdyq jumystarǵa belsene aralasady. Qaı jaǵynan da, qurby-qurdastaryna úlgi bolyp keledi. Anasy Gúljan Sısenova osy mektepte muǵalim. Ákesi Asqar Atkeshev - úı sharýasynda, jeke júk kóligi bar. Bir sózben aıtqanda, qarapaıym otbasy», dedi QazAqparat tilshisine Ǵalı Begalıev atyndaǵy orta mekteptiń dırektory Ernar Іlııasov.
Eske sala keteıik, BQO-da oqýshynyń úsh jasar balany qutqaryp qalǵanyn jazǵan bolatynbyz.
