BQO-da úsh myńǵa jýyq adam qysqa merzimdi kýrstarǵa jiberildi
ORAL. QazAqparat - Batys Qazaqstan oblysynda jyl basynan beri 2912 adam qysqa merzimdi kýrstarǵa jiberildi, dep habarlaıdy «QazAqparat» tilshisi.
BQO jumyspen qamtýdy úılestirý jáne áleýmettik baǵdarlamalar basqarmasynyń basshysy Qalııar Aıtmuhambetovtiń aıtýynsha, sonyń ishinde 1775 adam oqýlaryn aıaqtap, 370-i nemese 20,8 paıyzy jumysqa ornalastyryldy. Oqýǵa jiberilgenderdiń 1542-si - jastar, 263-i - az qamtylǵan otbasylardaǵy azamattar, 66-sy - múmkindigi shekteýli jandar, 1775-i - áıelder.
Elbasy tapsyrmasyna oraı qabyldanǵan Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasyna sáıkes jumysshy kadrlardy eńbek naryǵynda suranysqa ıe kásipter boıynsha qysqa merzimdi kásiptik oqýdan ótkizý erekshe mańyzǵa ıe bolyp otyr. Osyǵan oraı bıylǵy 27 sáýirde oblys ákiminiń qaýlysymen qurylǵan halyqty jumyspen qamtý máseleleri jónindegi óńirlik komıssııa otyrysynda qysqa merzimdi kásiptik oqýdy júzege asyratyn bilim berý uıymdary men mamandyqtar tizbesi bekitildi. Baǵdarlama krıterıılerine sáıkes tizbege tálimgerlik pen dýaldyq oqytý elementterin paıdalanǵan jáne qysqa merzimdi oqytý boıynsha bir jyldyq tájirıbesi bar oqý oryndary engizildi. Osylaısha, óńirdegi 25 kolledj ben 11 oqý ortalyǵyna jumysshy kadrlardy eńbek naryǵynda suranysqa ıe mamandyqtar boıynsha qysqa merzimdi kásiptik oqytý úshin 3132 adamǵa jalpy transfertter esebinen 408,4 mln teńge bólinse, bıylǵy 1 qarashaǵa sonyń 317,5 mln teńgesi ıgerildi. Jyl aıaǵyna deıin barlyǵy 3200-den astam adam oqýǵa jiberilip, qarjy tolyq ıgeriletin bolady.
Degenmen, bul máseleniń ekinshi bir jaǵyn aıtpaı ketýge bolmas. Ol - qysqa merzimdi kýrstarda oqyǵan azamattardy jumyspen barynsha qamtý. Ásirese, aýyldyq eldi mekenderde jumys oryndary tapshy ekendigi belgili. Sondyqtan ár aýdan nemese aýyl osy máselege taldaý jasap, turǵyndardy eńbek naryǵynda qajetti mamandyqtar boıynsha oqytýy tıis. ıAǵnı búgin oqyǵan adam erteń jumyssyz qalmaýy kerek. Bul týraly jýyrda «Kásiptik bilim jáne bıznes: áriptester suhbaty» degen taqyrypta ótken jetinshi oblystyq forýmda da sóz boldy.
Baǵdarlamaǵa sáıkes eńbek naryǵynyń qajettilikterin eskere otyryp, tehnıkalyq jáne kásiptik bilimi bar kadrlardy daıarlaý da ózekti bolyp otyr. Buǵan ómirlik qıyndyqqa tap bolǵan nemese turmysy tómen otbasylardan shyqqan 9-11-synyptardy bitirýshiler, oqý oryndaryna túse almaı qalǵandar, jumys izdep júrgen azamattar qatysa alady. Kúni búginge deıin oblystaǵy 22 kolledjde 13 jumysshy mamandyǵy boıynsha oqý úshin 800 adam jiberildi. Bul maqsatqa 160,8 mln teńge qaralsa, sonyń 79,4 mln teńgesi ıgerildi.
Aıta keteıik, atalmysh baǵdarlamany júzege asyrý úshin oblysqa barlyǵy 3539,8 mln teńge bólinse, on aıda sonyń 3196,8 mln teńgesi ıgerildi.
Elbasynyń bastamasy boıynsha bıyl «Barshaǵa arnalǵan tegin kásiptik-tehnıkalyq bilim berý» jobasy júzege asyryla bastady. Memleket basshysy bıylǵy Joldaýynda tegin oqytýmen eń áýeli jumyssyz jáne ózin-ózi tıimsiz jumyspen qamtyǵan jastar, sondaı-aq kásiptik bilimi joq eresek adamdardy qamtýǵa jáne kásiptik bilim berý júıesinde ekonomıkadaǵy jańa óndirister úshin mamandar daıarlaýǵa basa mán bergen bolatyn. Osy mindettiń birsypyrasy atalmysh baǵdarlamanyń «Azamattardy tehnıkalyq, kásiptik bilimmen jáne qysqa merzimdi kásiptik oqýmen qamtamasyz etý» 1-baǵyty aıasynda sheshilýde.
