BQO-da úsh qyz balaǵa seksýaldyq sıpattaǵy zorlyq jasaǵan turǵyn 16 jylǵa sottaldy
ORAL. QazAqparat – Batys Qazaqstan oblysynda úsh qyz balaǵa seksýaldyq sıpattaǵy zorlyq jasaǵan turǵyn 16 jylǵa sottaldy, dep habarlaıdy QazAqparat tilshisi.
BQO qylmystyq ister jónindegi mamandandyrylǵan aýdanaralyq soty 1978 jylǵy M-ǵa qatysty QR QK 121-baby 4-bóligine (seksýaldyq sıpattaǵy zorlyq-zombylyq áreketterin jas balaǵa qatysty jasaý) sáıkes aıyptaý úkimin shyǵardy.
M. ótken jylǵy qańtar aıynyń sońynda bas bostandyǵynan aıyrý oryndarynan jazasyn ótep kelgen. Sodan 2018 jyldyń aqpanynan 2019 jyldyń qańtaryna deıin úsh jas qyz balaǵa seksýaldyq sıpattaǵy zorlyq-zombylyq áreketterin jasaǵan. Oǵan alty epızod boıynsha aıyp taǵyldy.
Jabyq ótken basty sot talqysy barysynda M. óziniń jasaǵan áreketterin moıyndady.
Sot jaza taǵaıyndaǵan kezde M-nyń buryn birneshe ret sotty bolǵanyn, jazany jeńildetetin jáne aýyrlatatyn mán-jaılardy, jábirlenýshilerdiń zańdy ókilderiniń pikirlerin eskerdi.
M. QR QK 121-baby 4-bóligine sáıkes aıypty dep tanylyp, QK-niń 60-baby negizinde ony pedagogıkalyq jáne kámeletke tolmaǵandarmen jumys jasaýǵa baılanysty qyzmettermen aınalysý quqyǵynan aıyra otyryp, 16 jyl 2 aı merzimge bas bostandyǵynan aıyrý jazasy belgilendi.
Sottalýshy jazasyn qaýipsizdigi tótenshe (erekshe rejım) qylmystyq-atqarý júıesi mekemesinde óteıtin bolady. Sondaı-aq ol maskúnemdikten májbúrli túrde emdeledi.
Úkim zańdy kúshine endi.
Aıta keteıik, oqıǵa Jánibek aýdanynda bolǵan. Jábirlenýshilerdiń ekeýi sottalýshynyń jaqyny, bireýi olardyń dos qyzy bolǵan.
