BQO-da úsh kúnde jol erejesin buzǵan 271 avtobýs júrgizýshisi anyqtaldy
ORAL. QazAqparat - Batys Qazaqstan oblysynda «Avtobýs» jedel aldyn alý sharasy barysynda 13-15 maýsym aralyǵynda jol erejesin buzǵan 271 qoǵamdyq avtokólik júrgizýshisi anyqtaldy, dep habarlaıdy «QazAqparat» tilshisi.
BQO ishki ister departamentiniń baspasóz qyzmetinen túsken málimetke qaraǵanda, sonyń ishinde 18-i jyldamdyǵyn shekten tys arttyrǵany úshin, 71-i burylý tártibin buzǵany úshin toqtatyldy. Sondaı-aq 36 júrgizýshi jolaýshylar men júkterdi tıisti qujatsyz tasymaldasa, 86-sy avtokólik aıdap kele jatyp, telefon nemese radıostansa quralyn paıdalanǵan. 31-i tehnıkalyq baıqaýdan ótpegen kólikti aıdasa, 14-i azamattyq-quqyqtyq saqtandyrý polısinsiz júrgen. 10 júrgizýshi lastaıtyn zattardy óndiristik normatıvten tys tastaıtyn avtokólikti júrgizse, úsheýi jaıaý júrginshini ótkizbegen. Avtokólikti zańsyz qaıta jabdyqtaǵan jáne jolaýshy tizimi bolmaǵan eki júrgizýshi de nazardan tys qalmady.
