BQO-da úsh qyz Jaıyq ózenine batyp ketti

ORAL. KAZINFORM – BQO-da bir aýyldyń úsh qyzy sýǵa batyp ketti.  

BQO TJ departamentiniń baspasóz qyzmetinen málim etkenindeı, qaıǵyly oqıǵa 11 shilde kúni Aqjaıyq aýdany Mergen aýyly mańynda bolǵan. 

«Sol kúni Jaıyq ózeni jaǵasynan shomylýǵa tyıym salynǵan jerden belgisiz jaǵdaıda joǵalyp ketken úsh jasóspirimniń zattary (velosıped, kıimderi) tabyldy. BQO TJ departamenti qutqarýshylarynyń kúshimen 2010 jáne 2011 jylǵy qyzdardyń denesi sýdan shyǵaryldy. Jasóspirimderdi izdeýge TJ, polıtsııa departamenti, jergilikti atqarýshy organdar jáne turǵyndar esebinen 70 adam, 20 tehnıka jumyldyryldy», - dep habarlady vedomstvodan.

Olardyń ekeýiniń denesi sol kúni, úshinshisi 12 shilde kúni sýdan tabyldy. 

Turǵyndardyń sózine qaraǵanda, qyzdar bir synypta oqyǵan. 14 shilde kúni úshinshi qyz jerlendi.

Eske sala keteıik, budan buryn Batys Qazaqstanda taǵy bir jasóspirimniń sýǵa ketkenin jazǵan edik.