BQO-da úsh birdeı respýblıkalyq joldy jóndeý jalǵasady
ORAL. QazAqparat - Batys Qazaqstan oblysynda bıyl úsh birdeı respýblıkalyq joldy kúrdeli jóndeý jumystary jalǵasady, dep habarlaıdy «QazAqparat» HAA tilshisi.
Oblys ákimi Altaı Kólginovtiń málim etkenindeı, Oral-Tasqala-RF shekarasy baǵytyndaǵy kúre jol «Nurly jol» baǵdarlamasy aıasynda qaıta salynyp jatsa, sol sekildi Chapaev-Jalpaqtal-Qaztalov, Qaztalov-Jánibek joldary kúrdeli jóndelýde. Oǵan qosa jergilikti mańyzy bar Aqsaı-Jympıty, Chapaev-Jańaqala, Oral-Kırsanov, Barbastaý-Aqjaıyq-Inder jáne Úlken Shaǵan-Peremetnyı joldary ortasha jóndeýden ótkiziledi. Buǵan 6,7 mlrd. teńge qaralyp otyr. Sondaı-aq Oral qalasy kósheleriniń joldary men depo mańyndaǵy kópir jóndeledi.
«Joldy salǵan kezde qarjylandyrýmen birge onyń sapasyna erekshe kóńil bólemiz. Mysaly, ótken jyly 23,5 mlrd. teńgege 290 km astam jol jóndeldi, bul aldyńǵy jylǵydan 5 mlrd. teńgege kóp. Sonyń ishinde 10,8 mlrd. teńgege respýblıkalyq, oblys ortalyǵynda 4 mlrd. teńgege 22 km, aýdandarda 2,5 mlrd. teńgege 30 km jol jóndeldi. Budan bólek Aqsaı-Bórli jolynyń 24 shaqyrymyn jóndep, aıaqtaýǵa «QPO b.v.» kompanııasynyń áleýmettik jaýapkershiligi aıasynda 3,5 mlrd. teńge jumsaldy. Bul - atalǵan kompanııanyń oblystyń áleýmettik jobalaryna jyl saıyn bóletin 20 mln. dollarynan tys qarjy. Osyndaı jumystar nátıjesinde tórt aýdan ortalyǵy - Qaratóbe, Shyńǵyrlaý, Jańaqala, Peremetnyı aýyldary Oral qalasymen aradaǵy qatqyl tabandy jolǵa qosyldy», dedi óńir basshysy.
