BQO-da úsh birdeı aýylǵa tabıǵı gaz jetkizildi

ORAL. QazAqparat – Terekti aýdanynda Dolınnyı, Tóńkeris jáne Qonyssaı aýyldaryna tabıǵı gaz jetkizildi, dep habarlaıdy QazAqparat tilshisi.

Aýyl turǵyndarynyń qýanyshyna ortaqtasqan oblys ákimi Ǵalı Esqalıevtiń aıtýynsha, jyl basynda aýdanda gazben qamtý kórsetkishi 89 paıyz bolsa, endi 96 paıyzǵa jetpek.

Jyl sońyna deıin Terekti aýdanynda taǵy toǵyz aýyl kógildir otynǵa qosylatyn bolady.

Terekti – qalaǵa jaqyn ornalasqan aýdannyń biri, Qarashyǵanaq kenishi de alys emes. Gazdyń ústinde otyrǵanymen, atalmysh aýyl turǵyndary kógildir otynǵa qol jetkize almaı kelgen edi. Endi olar qysqa otyn jınaý, ot jaǵyp, kúl shyǵarý mashaqatynan qutyldy.

Jumyspen qamtýdyń jol kartasy aıasynda Dolınnyı, Tóńkeris, Qonyssaı aýyldaryna gaz qubyryn tartý úshin bıýdjetten 337 mln teńge bólindi.

Bilim salasynda uzaq jyl eńbek etken Dolınnyı turǵyny Aleksandra Mazýrdyń málim etkenindeı, bul ıgilikti olar on jyl boıy kútken.

«Bıylǵy qańtar aıynda ákimderdiń esep berýi kezinde biz osy máseleni óńir basshysynyń aldyna qoıǵan edik. Buryn mektep te salqyn bolǵandyqtan, balalar tońyp shyǵatyn. Endi munyń bári artta qaldy», dedi A.Mazýr.