BQO-da úsh birdeı áleýmettik nysan paıdalanýǵa berilmek
ORAL. QazAqparat - Batys Qazaqstan oblysynda jyl sońyna deıin úsh birdeı áleýmettik nysan paıdalanýǵa beriledi, dep habarlaıdy QazAqparat.
Oblystyq qurylys basqarmasy óndiristik-tehnıkalyq bóliminiń basshysy Álibek Antazıevtiń aıtýynsha, atalmysh nysandardyń ishinde eń úlkeni - Oral qalasynda boı kóterip jatqan oqýshylar jáne jastar saraıy. Quny 2,841 mlrd. teńgege baǵalanǵan iri nysandy «Altaır» JShS salýda. Sol sekildi Aqsaı qalasynda dene shynyqtyrý jáne saýyqtyrý kesheni qurylysy aıaqtalyp keledi. 866,526 mln. teńgeniń nysanyn «ATK» kompanııasy turǵyzýda. Bul eki nysan da «QPO b.v.» qarjysyna salynýda.
Zelenov aýdany Ozernyı aýylynda jergilikti bıýdjet esebinen 48 oryndyq mektepti (217,650 mln. teńge) «Otdelstroı» qurylys fırmasy paıdalanýǵa bermekshi.
Jalpy, bıyl barlyq qarjy kózderinen áleýmettik nysandar qurylysyna 1429,663 mln. teńge bólingen. Sonyń ishinde 1142,580 mln. teńge jergilikti qazynadan, 287,083 mln. teńge Ulttyq qordan qaralǵan. Buǵan deıin úsh nysannyń qurylysy támamdaldy. Olardyń ekeýi balabaqsha bolsa, bireýi - Oraldaǵy qalalyq kópbeıindi aýrýhana.
Eske sala keteıik, oqýshylar jáne jastar saraıynan Rıo olımpıadasynyń chempıony, Batys Qazaqstannyń túlegi Danııar Eleýsinov atyndaǵy boks ortalyǵy da ashylatyn bolady.
