BQO-da úsh aýysymdy mektepter máselesi qalaı sheshilip jatyr
ORAL. KAZINFORM — Batys Qazaqstan oblysynda úsh aýysymdyq jáne apattyq jaǵdaıdaǵy mektepter máselesi kún tártibinen túsken joq. Osy oraıda Kazinform tilshisi sala basshylary jáne ata-analarmen tildesip, máseleni zerdelep kórdi.
Úsh aýysymdy jáne apatty mektepter sany qansha?
BQO bilim basqarmasynan málim etkendeı, oblys boıynsha úsh aýysymdyq 9 mektep jumys istep tur.
Atap aıtqanda, bul tizimge Oral qalasyndaǵy estetıkalyq baǵyttaǵy mektep-gımnazııa, № 20, № 24, Hıýaz Dospanova atyndaǵy № 30, Álııa Moldaǵulova atyndaǵy № 38, Terekti aýdanynda Podstepnyı qazaq mektebi, Bórli aýdany ortalyǵy Aqsaıdaǵy № 7, № 6 jáne Báıterektiń Baıqonys aýylyndaǵy Qadyr Myrza Áli atyndaǵy orta mektep kiredi.
Qazirgi tańda óńirde «Jaıly mektep» ulttyq jobasy aıasynda mektepter qurylysy júrip jatyr. Oǵan qosa bilim berý ınfraqurylymyn damytý qory esebinen mektepter salý kózdelgen.
Osylardy paıdalanýǵa bergen mezgilde 2025-2026 jyldary óńir mektepteriniń úsh aýysymdylyǵyn tolyq joıý josparlanyp otyr.
Basqarma derekterine qaraǵanda, oblysta apattyq jaǵdaıdaǵy 16 mektep bar. Aqjaıyq aýdanynda Jańajol, Jánibekte Ǵ.Qarash atyndaǵy, Tegisshil, A.Orazbaeva atyndaǵy, Kaztalovta Qonys, Satybaldy, N.Dúısenǵalıev atyndaǵy, Bórlide Pýgachev mektep-bóbekjaı-balabaqsha kesheni, Keńtúbek, Aqsaı qalasy № 1, Qaratóbede Jaqsybaı, Tólen, Tasqalada Aınabulaq, Oralda № 8, № 27, № 43 mektepter osyndaı kúıge ushyraǵan.
Qazirgi tańda «Jaıly mektep» jobasy aıasynda Aqsaıda № 1 jáne Pýgachev mektep-bóbekjaı-balabaqsha kesheni ǵımaraty jańadan boı kóterýde. Al Oralda bilim berý ınfraqurylymyn damytý qory esebinen 400 oryndyq № 8 mektep salynyp jatyr.
Budan bólek, «QPO b. v.» kompanııasynyń áleýmettik-ınfraqurylymdyq jobalary esebinen bıyl Jánibek aýdany Jánibek aýylynda 108 oryndyq A.Orazbaeva atyndaǵy, Tasqalada 60 oryndyq Aınabulaq, Qaratóbede Sáýle aýylynda 60 oryndyq Jaqsybaı, Kaztalovta 60 oryndyq Qonys mektebiniń qurylysy bastalmaqshy.
— Qabyldanǵan júıeli sharalar nátıjesinde 7 apattyq mektep tolyq jónge keltirilmekshi. Qalǵan 10 mektep boıynsha «QPO b. v.» kompanııasynyń áleýmettik-ınfraqurylymdyq jobalary aıasynda jáne bilim berý ınfraqurylymyn damytý qory esebinen sheshim talap etiledi, — deıdi bilim basqarmasynyń mamandary.
Oblys boıynsha úsh aýysymdyq 9 mektepte kúni búgin 14 280 oqýshy bilim alýda. Atalmysh bilim nysandarynda sońǵy úsh jyl boıynsha ortasha bilim sapasy 60 paıyz boldy.
Muǵalim, ata-ana ne deıdi?
Oralda balalar úsh aýysymda oqyp jatqan bilim nysandarynyń biri — № 24 orta mektep.
Mektep dırektory Gúlsim Satybaevanyń aıtýynsha, munda 89 synypta 2 600 oqýshy bilim alýda.
— Mekteptiń jobalyq syıymdylyǵy — 1 296 oryn. Sonda eki mekteptiń balasy oqyp jatyr dep aıtýǵa bolady. Bul, árıne, bilim sapasyna áser etedi. Eń basty másele — oqýshylardyń qaýipsizdigi. 2 synyp oqýshylary syımaǵandyqtan, № 41 mektep-lıtseıdiń qabyrǵasynda bilim alýda. Ár synypta 30, 30-dan astam bala otyr, bul da sanıtarlyq norma talaptaryna saı emes. Osy 4-shaǵynaýdanda bala sanynyń kóbeıýine baılanysty qosymsha mektep salynýy kerek dep oılaımyz. Óıtkeni synyptardaǵy balanyń kóptigi muǵalimniń, jalpy ujymnyń jumysyna, kórsetkishine áser etetini belgili, — deıdi G.Satybaeva.
Osy bilim ordasynda balalary oqıtyn Aınur Arystanova kókeıindegi oıyn búgip qalmady.
Onyń sózine qaraǵanda, uly altynshy, qyzy tórtinshi synypta bilim alady eken. Jalpy, bul — qalanyń 4, 5, 6, 7, 9 shaǵynaýdandaryn, eski áýejaı aýdanyn qamtıtyn orys tilinde bilim beretin jalǵyz mektep.
— Bala sany óte kóp, bir synypqa keminde 30 oqýshydan keledi. Onyń ústine mektep ǵımaraty eski, keıbir kabınetter qysta sýyq. Jóndelmeı jatyr dep aıta almaımyn, biraq jaǵdaı solaı. Synyptaǵy oqýshynyń kóptigi eń aldymen sanıtarlyq normalarǵa qaıshy, ekinshiden, ustazdarǵa da qıyndyq týǵyzyp otyr. Aǵylshyn tili, qazaq tili, ınformatıka syndy pánderdi eki topqa bólip oqytý kerek. Kabınettiń jetispeýshiliginen oǵan múmkindik bolmaı otyr. Qoryta aıtqanda, osy aýdanda jańa mektep salynsa deımin, — dedi A.Arystanova.
Zachagan kentindegi H.Dospanova atyndaǵy № 30 orta mektep 2024-2025 oqý jylyn 2 110 oqýshymen bastaǵan.
Mektep basshysy Darıa Qabdýllıevanyń bergen málimetine qaraǵanda, 770 oryndyq bilim ordasynda mektepaldy daıarlyq toby, 1-4 synyptar úsh aýysymda oqytylyp kelgen.
Onyń málimdeýinshe, baǵdarlama barlyq talapqa sáıkes tolyq oryndalyp otyrdy. Oqýshylar mektep avtobýstarymen kúnine 9 reıs jasaý arqyly tasymaldandy.
Jumys oqýshy, ata-analar arqyly kúnbe-kún úzdiksiz júrgizilip otyrǵandyqtan, mekteptiń birinshi jartyjyldyqta úsh aýysymda jumys jasaǵany aıtarlyqtaı qıyndyq týdyrmady. Pán muǵalimderiniń sabaqtary yńǵaıly kestege qoıyldy, solaı júktemeler bólinip, muǵalimder tarapynan narazylyq týyndaǵan joq.
Mektep ákimshiligi barlyq úsh kezeńde de kezekshilik atqaryp, qosymsha jas mamandar mektebi ustazdarynyń uıymdastyrýymen ǵımaratqa bógde adamdardy kirgizbeý jaǵy jáne oqýshylardyń artyq qozǵalysy bolmaýy qadaǵalandy.
— Osy aýdanda «Jaıly mektep» jobasy aıasynda № 52 mekteptiń ashylýy oqýshylarymyz ben ata-analarǵa qýanysh syılady. Jańa mektepke 1 060 oqýshy aýyssa, 75 muǵalim sonda jumysqa ornalasty. Balalar úshin jaıly mektepte barlyq jaǵdaı jasalǵan, ádistemelik jáne kórnekilik jaǵynan tolyq qamtamasyz etilgen, — deıdi D.Qabdýllıeva.
Kúrdeli jóndelip jatqan mektepter jaıy neshik?
Túıtkildi máseleniń biri — ǵımaraty kúrdeli jóndelip jatqan mektepter jaıy.
Oral qalasynda «QPO b. v.» kompanııasynyń áleýmettik-ınfraqurylymdylyq jobalary aıasynda daryndy balalarǵa arnalǵan S. Seıfýllın atyndaǵy № 11 oblystyq
mamandandyrylǵan mektep-lıtseı-ınternaty, № 17, № 9 orta mektep jáne D. Nurpeıisova atyndaǵy balalar mýzyka mektebi kúrdeli jóndeýden ótkizilýde.
Bul nysandarda jumys ótken jyly bastalyp, ony jeltoqsan aıynda bitirý kózdelgenimen, merziminde aıaqtala qoıǵan joq. Qazirgi ýaqytta BQO bilim basqarmasy jóndeý jumystary aldaǵy aqpan aıynda máresine jetedi dep otyr.
Oraldaǵy qara shańyraq — daryndy balalarǵa arnalǵan S. Seıfýllın atyndaǵy № 11 oblystyq mamandandyrylǵan mektep-lıtseı-ınternaty qalanyń ortalyǵynan Zachagan kentindegi úsh aýysymdyq № 20 mektep ǵımaratyna kóship kelip, sonda oqyp jatyr.
Ata-analardyń sózine qaraǵanda, balalardyń úırengen jerinen alystap ketýi olardy tasymaldaýda qıyndyq týǵyzǵan.
Mektep dırektory Shynar Zulqasheva jóndeý barysynda qosymsha jumystar qosylǵandyqtan, munyń jalǵasyp jatqanyn jetkizdi.
Kúni búgin № 20 mektep ǵımaratynda 630 oqýshy bilim alýda.
Qaladaǵy № 17 orta mektep dırektory Marat Zaınýllıev jóndeýdiń aıaqtalýǵa jaqyndaǵanyn, usaq-túıek jumystary qalǵanyn aıtty.
— Qazirgi tańda oqýshylar № 5 jáne № 16 mektepterde bilim alyp jatyr. Jóndeý jumystary bite keldi. Bir-eki aptada kóshýge bolady dep oılap otyrmyz, — dedi № 9 orta mektep dırektory Maıra Esenǵazıeva.
D.Nurpeıisova atyndaǵy balalar mýzyka mektebiniń dırektory Muhambetqalı Dalbaev nysandy aldaǵy aptada memlekettik komıssııa qabyldaǵaly jatqanyn habarlady.
Bilim basqarmasynyń málimetinshe, Memleket basshysynyń 2024 jylǵy 2 qyrkúıektegi Qazaqstan halqyna Joldaýynda berilgen tapsyrmasyn oryndaý maqsatynda 2025 jyly 5 mektepti kúrdeli jóndeý josparlanǵan.
Buǵan oblystyq bıýdjet esebinen qarajat qarastyryldy. Búgingi tańda konkýrstyq rásimder júrgizilýde.
Konkýrstyq rásimder ýaqytynda aıaqtalyp, merdigerler anyqtalyp, jumys mezgilinde bastalsa, jaqsy. Eger olaı bolmaǵan jaǵdaıda bul kúrdeli jóndeý jumystarynyń da uzaqqa sozylyp ketýi yqtımal.
Eske sala keteıik, budan buryn Oralda kúrdeli jóndelip jatqan mektepterdiń oqýshylary qalaı oqyp júrgenin jazǵan bolatynbyz.
Sondaı-aq BQO-da eki lıtseıde oqýshylardy konkýrs arqyly qabyldaýǵa qatysty daý týyndady.
