BQO-da úsh aýdan ákimi laýazymyna 9 úmitker tirkeldi

Batys Qazaqstan oblysynda úsh aýdan ákimi laýazymyna 9 úmitker tirkeldi, dep habarlaıdy Kazinform. 

BQO aýmaqtyq saılaý komıssııasy málim etkendeı, kandıdattardy tirkeý 10 qazan kúni jergilikti saǵat 18.00-de aıaqtalyp, úgit-nasıhat jumystary bastalyp ketti. 
Bókeı ordasy aýdanynda «AMANAT» partııasy usynǵan, osy kezge deıin aýdan ákimi qyzmetin atqaryp kelgen Nurlybek Daýmov, sondaı-aq ózin-ózi usynǵan Narynbek Keresh pen Meırambek Ǵılmanov tirkeldi. 
Qaratóbe aýdanynda «AMANAT» partııasy atynan, osy kezge deıin aýdan basshysy bolǵan Qadyrjan Súıeýǵalıev, ózin-ózi usynǵan Ermek Saıynov pen Qanat Muqanov dodaǵa túspekshi. 
Tasqala aýdanynda «AMANAT» partııasy atynan aýdan ákiminiń orynbasary mindetin atqarǵan Talǵat Shákirov, «Qazaqstan halyq partııasy» atynan Bekjan Toqjanov jáne ózin-ózi usynǵan Mels Naryqov úmitker bolyp otyr. Atalǵan aýdan ákimderin saılaý 5 qarasha kúni ótedi. 

«Kandıdattardyń úgittik baspa materıaldaryn ornalastyrý úshin arnaıy 62 oryn bólindi. Ortalyq saılaý komıssııasy bergen formatqa sáıkes kandıdattar týraly qosymsha aqparattyq stendiler ýchaskelik saılaý komıssııalarynda ornalastyrylady. Bólingen úı-jaıda kandıdattardyń saılaýshylarmen kezdesýler kestesin saılaý komıssııalary jergilikti atqarýshy organdarmen birlesip isteıdi jáne buqaralyq aqparat quraldarynda jarııalanady. 4 qarasha kúni saǵat 00.00-de aıaqtalatyn úgit-nasıhat jumystary úshin úmitkerlerge barlyq jaǵdaı jasaldy», - dep habarlady vedomstvo ókilderi. 

Eske sala keteıik, budan buryn Batys Qazaqstanda bir aýdanda ákim saılaýyna birden 7 úmitker túsip jatqanyn jazǵan edik.