BQO-da úsh adam qaza tapqan jol apaty: dárigerler naýqastardyń jaǵdaıy týraly aıtty

ORAL. KAZINFORM – Batys Qazaqstan oblysynda Samara-Shymkent kúre joly boıynda bolǵan jol-kólik oqıǵasynan 7 adam zardap shekti.

BQO densaýlyq saqtaý basqarmasy baspasóz qyzmetiniń málimdeýinshe, olardyń úsheýi oqıǵa ornynda qaza tapty.

Dárigerlerdiń sózine qaraǵanda, zardap shekkenderge Shyńǵyrlaý aýdany Almaz aýyly medıtsınalyq pýnktiniń feldsheri men Syrym aýdandyq aýrýhanasynyń hırýrgi alǵashqy kómek kórsetken.

— Aýrýhanaǵa jetkizilgen tórt adamnyń ekeýi Oral qalasyndaǵy oblystyq kópbeıindi aýrýhanaǵa jiberildi. Syrym aýdandyq aýrýhanasynda jatqan bireýiniń jaǵdaıyna baılanysty sanıtarlyq avıatsııa shaqyrtyldy. Qalǵan bir naýqas úıinen ambýlatorlyq em alatyn bolady, — dep habarlady vedomstvodan. 

Eske sala keteıik, budan buryn Batys Qazaqstanda jol apatynan úsh adamnyń kóz jumǵanyn jazǵan bolatynbyz.