BQO-da úsh adam qaza tapqan jol apaty boıynsha sot úkimi shyqty

ORAL. KAZINFORM – BQO qylmystyq ister jónindegi mamandandyrylǵan aýdanaralyq sotynda eki júrgizýshi Álibek Meńdiǵalıev pen Dvýmar Lıýshanloǵa qatysty QR QK 345-baby, 4-bóligine (abaısyzda eki nemese odan da kóp adamnyń ólimine ákep soqqan is-áreket ) sáıkes qylmystyq is qaraldy.

BQO sotynyń baspasóz qyzmetinen málim etkenindeı, Á. Meńdiǵalıev Samara-Shymkent tas jolynda «Toyota Land Cruiser 150» avtokóligimen jol qozǵalysy erejelerin óreskel buzǵan. Qarsy jolaqqa shyǵyp ketip, D. Lıýshanlo aıdap kele jatqan júk kóligimen soqtyǵysqan. Saldarynan jeńil kólik otqa oranyp, úsh adam kóz jumdy.

Sot úkimimen Á. Meńdiǵalıev QR QK 345-babynyń 4-bóligi boıynsha kináli dep tanyldy jáne qaıtys bolýyna baılanysty qylmystyq jaýapkershilikten bosatyldy. Onyń kinási oryndy tekserý hattamasymen, jol-kólik oqıǵasy shemasymen, saraptamalardyń qorytyndylarymen jáne Lıýshanlo men sarapshylardyń aıǵaqtarymen dáleldengen.

— D. Lıýshanlo QR QK 345-babynyń 4-bóligi boıynsha kinásiz dep tanyldy jáne qylmystyq quqyq buzýshylyq quramynyń joq bolýyna baılanysty aqtaldy. Onyń kinásizdigi keshendi qaıta kólik-trasologııalyq saraptamanyń qorytyndysymen rastalady. Soqtyǵysý kezinde «Volvo FH» avtomashınasy óziniń qozǵalys jolaǵynda bolǵan jáne júrgizýshi tejeý jolymen soqtyǵysýdyń aldyn alý sharalaryn qoldanǵan. Sot úkimi zańdy kúshine engen joq, - dep habarlady vedomstvodan. 

Eske sala keteıik, budan buryn Batys Qazaqstanda Toyota Prado júk kóligimen soqtyǵysyp, úsh adamnyń qaza tapqanyn jazǵan bolatynbyz.