BQO-da «Urlyqqa tosqaýyl» jobasy júzege asyrylýda
ORAL. QazAqparat - Batys Qazaqstan oblysynda «Urlyqqa tosqaýyl» jobasy júzege asyrylýda, dep habarlaıdy «QazAqparat» HAA tilshisi.
BQO prokýratýrasynyń baspasóz qyzmetinen túsken málimetke qaraǵanda, atalmysh jobany Bas prokýratýra 2016 jyldan qolǵa alǵan bolatyn. Soǵan sáıkes oblys prokýratýrasynyń bastamasymen vedomstvoaralyq jospar da jasaldy. Ótken jylǵa deıin óńirde urlyq sany únemi ósip, úlestik salmaǵy 50 paıyzǵa deıin jetti. Joba aıasynda 2016 jyldyń tamyzynan bergi mezgilde 140-tan astam beıne baqylaý qondyrǵylary ornatyldy. Taǵy eki júzin ornatýǵa bıýdjetten 360 mln. teńge bólindi. Seksennen astam úıge domofondar qoıyldy. Jol-patrýldik qyzmet tolyqtaı jasaqtaldy. Kúzetiletin 5 avtoturaq ashyldy. 3 myńnan astam jumys orny ashylyp, oǵan áleýmettik jaǵynan az qamtylǵan turǵyndar ornalastyryldy. Myń jarymnan astam muqtaj otbasylarǵa materıaldyq kómek kórsetildi.
Osyndaı jumystar nátıjesinde 2016 jyldyń qorytyndysy boıynsha urlyq 5 paıyzǵa, aı saıynǵy tirkelgen derekter 200-ge azaıdy. Kóshedegi urlyq 18, saýda oryndarynda 40 paıyzǵa qysqardy. Urlyqtyń ashylýy 45-ten 58 paıyzǵa joǵarylady.
Bıylǵy jyl sońyna deıin urlyq sanyn 8-10 paıyzǵa tómendetý kózdelýde.
Oblys ortalyǵynda da tıisti sharalar júrgizilýde. Sonyń nátıjesinde urlyqtyń ósý qarqyny 2016 jylǵy 1 qyrkúıektegiden bıylǵy aqpan aıynyń sońynda 20,3-ten 8,4 paıyzǵa deıin báseńdedi. Aı saıyn tirkeletin urlyq sany orta eseppen 50 qylmysqa azaıdy.
Bıylǵy eki aıda 772 (ótken jyly osy merzimde - 843) bótenniń múlkin jasyryn urlaý deregi tirkelip, 8,4 paıyzǵa kemidi. Barlyq tirkelgen urlyqtyń 43,7 paıyzdan astamy qoǵamdyq oryndarda (338) jáne kóshelerde (167) jasalǵan. Taldaý barysy kórsetkenindeı, shaharda jasalǵan árbir tórtinshi urlyq uıaly telefondy jymqyrýmen baılanysty - 204 (285), bul ótken jylǵydan 28,4 paıyzǵa tómendegen. Sonyń ishinde 127-si (214) qoǵamdyq oryndarda qymqyrylǵan.
