BQO-da Uly Otan soǵysynan qalǵan snarıad tabyldy
ORAL. QazAqparat - 24 naýryz kúni saǵat 19.20-da Bókeı ordasy aýdany ortalyǵy Saıqyn aýylynyń turǵyny óz úıiniń aýlasynan snarıad tabylǵany jóninde habar bergen, dep habarlaıdy «QazAqparat» HAA tilshisi.
BQO ishki ister departamentiniń baspasóz qyzmetinen túsken málimetke qaraǵanda, Uly Otan soǵysynan qalǵan dıametri 20 sm, uzyndyǵy 67 sm snarıad sý qubyryn tartý úshin jer qazý jumystaryn júrgizý kezinde úıden 10 metr qashyqtyqtan shyqqan.
Sol boıda qaýipsizdik sharalary alynyp, snarıadty zalalsyzdandyrý úshin arnaıy komıssııa quryldy.
Aıta keteıik, BQO aýmaǵynda azamat jáne Uly Otan soǵysynan qalǵan snarıadtar buǵan deıin de tabylyp kelgen bolatyn. Onyń ústine Stalıngrad maıdanyna tıip turǵandyqtan, Bókeı ordasy jáne Jánibek aýdandary soǵys jaǵdaıynda dep jarııalanyp, bul aýmaqqa talaı bomba, snarıad túskeni málim.
