BQO-da Ulttyq ulan jaýyngeri uryny ustady
ORAL. QazAqparat - Oralda ýaqytsha beıimdeý jáne jınaqtaý ortalyǵynyń kezekshisi - QR Ulttyq ulany 5517-áskerı bólimi jedel maqsattaǵy batalony áskerı tobynyń bastyǵy, serjant Asqarbek Amanjolov málimetterdi tekserý barysynda B. degen azamattyń tergeýden boı tasalap, QR QK 188-baby 1-bóligine sáıkes (iri kólemdegi urlyq) izdestirilýde júrgendigin anyqtady, dep habarlaıdy «QazAqparat» tilshisi.
«Batys» óńirlik qolbasshylyǵynyń baspasóz qyzmetinen túsken málimetke qaraǵanda, sonyń nátıjesinde 14 shilde kúni saǵat 17.30 shamasynda Bórli aýdany Býmakól aýylynda turatyn B. Oral qalasyndaǵy ýaqytsha beıimdeý jáne jınaqtaý ortalyǵyna jetkizildi. Sodan keıin ustalǵan kúdikti Oral qalalyq ishki ister basqarmasyna berildi. Tekserý barysynda 1981 jylǵy B-nyń Oral qalasynda jasalǵan urlyq boıynsha izdestirilýde júrgendigi belgili boldy.
Sol kúni Aqtóbe qalasynda Ulttyq ulan jaýyngerleri alaıaqty qolǵa túsirdi. 6655-áskerı bólimniń quramynda serjant Oljas Tálipov, qatardaǵy jaýyngerler Berik Syrbasbaı men Abaı Darhan bar áskerı toby saǵat 18.30 shamasynda Janǵoja batyr kóshesi boıyndaǵy «Delfın» dúkeni mańynda páterlerdi jalǵa beremin dep, aldaý jolymen jábirlenýshiniń 10 myń teńgesin qaǵyp ketken alaıaqty ustady. Kúdikti Elek polıtsııa bólimine jetkizilip, QR QK 190-babyna sáıkes (alaıaqtyq) onyń basqa da qylmystarǵa qatystylyǵy tekserilýde.
Qyraǵylyǵy úshin atalǵan jaýyngerler yntalandyryldy.
