BQO-da «Uly ónerdiń uly arnasy» atty respýblıkalyq dombyrashylar baıqaýy ótti
ORAL. KAZINFORM — Qasıetti dombyranyń únimen dúıim jurtty tánti etken respýblıkalyq dombyrashylar baıqaýynyń kúı astanasynyń aýdanda ótkeni óńir turǵyndarynyń mereıin odan ári asyra tústi.
Óner merekesiniń ekinshi kúni Kópjasar aýylyndaǵy Dına Nurpeıisova atyndaǵy mektepte jalǵasty. Munda belgili qobyzshy Aqnar Táttibaıqyzynyń qatysýymen ótken sheberlik saǵaty jınalǵan qaýymdy kıeli aspaptyń sıqyrly álemine jeteledi. Aqnar Táttibaıqyzy qobyzdyń tereń bolmysy men qos ishektiń arasyna jasyrynǵan ulttyq kodtyń mán-maǵynasyn ashty. Tula boıdy shymyrlatqan qobyz úninen soń, aýyldyń jas qobyzshylary da óz ónerlerin kórsetip, atadan qalǵan asyl muranyń úzilmeıtinin dáleldedi.
Shara aıasynda meımandar mektep qabyrǵasyndaǵy Dına Nurpeıisova murajaıyna saıahat jasady. Kúı anasynyń ómiri men shyǵarmashylyǵynan syr shertetin qundy, tarıhı jádigerler men buıymdar qonaqtardyń rýhyn asqaqtatyp, ótken tarıhqa taǵy bir márte taǵzym etkizdi.
Osy ýaqytta úlken sahnada «Ásem qońyr» respýblıkalyq baıqaýynyń kórigi qyzyp jatty. Elimizdiń ár óńirinen aǵylyp kelgen úmitkerler eki kezeńnen turatyn dúbirli dodada baq synasty. Astana men Almaty qalalarynan arnaıy shaqyrylǵan, elimizge belgili óner maıtalmandarynan quralǵan qazylar alqasynyń aldynda óner kórsetý úmitkerlerge ońaıǵa túsken joq. І kezńde qatysýshylar mindetti túrde «Meńdiqara», «Dınanyń bulbuly», «Jiger» syndy kúrdeli shyǵarmalardy jáne bekitilgen 12 kúıdiń ishinen qazylar alqasynyń tańdaýymen taǵy bir kúıdi oryndap shyqty. Al ІІ kezeńde úmitkerler ózderi tańdaǵan Dına Nurpeıisovanyń mindetti 3 kúıin jáne aldyn ala berilgen Mámen, Oqap, Qurmanǵazy týyndylarynyń birin qazylar alqasynyń suraýy boıynsha joǵary sheberlikpen naqyshyna keltirdi.
Sharanyń eń tolqynysty sáti — baq pen bap synalǵan dodanyń júldegerlerin anyqtaý sáti boldy. Bul tek marapat qana emes, ónerpazdardyń talanty men eren eńbeginiń jemisi edi.
Sahna tórinde shyǵarmashylyq serpin bergen 50 myń teńge jáne alǵyshatpen Bekzat Ramazan (Oral), Muhamedııar Tańatarov (Oral) jáne Ótesin Pazylbekov (Almaty) marapattalsa, 100 myń teńge kólemindegi «Dıplomant» júldesi Oral qalasynan kelgen Rahman Qoıshekenge buıyrdy.
Kúı qudiretin jete túsinip, júldeli ІІІ oryndy (150 myń teńge) Syrym Shonbaev (Jambyl oblysy), Aısha Janaıdqyzy (Oral) jáne Nargıza Kasýmova (Oral) ózara bólisti. Zor sheberlik tanytyp, ІІ orynnyń (200 myń teńge) bıiginen kóringender qatarynda Raıymbek Tarıhov (Oral), Dana Dıdar (Astana) jáne Qymbat Ǵabdýllına (Astana) boldy.
Dúbirli dodada ozyp shyǵyp, І dárejeli dıplom men 300 myń teńgeniń aqshalaı sertıfıkatyn qanjyǵasyna baılaǵan qos myqty — Qyzylorda oblysynan kelgen Beknur Ábdıjálı men Almaty qalasynyń namysyn qorǵaǵan Juldyzaı Kengesbaeva kórermenniń erekshe yqylasyna bólendi.
Al osynaý aıtýly óner báıgesiniń eń bıik shyńy — Bas júlde bolyp, Oral qalasynyń týmasy, dúldúl dombyrashy Ádilet Joldyǵalı 500 myń teńgelik qomaqty syılyqty ıelenip, baıqaýdyń absolıýtti jeńimpazy atandy.
Býyrqanǵan bulaqtaı tasyǵan kúı óneriniń bul kúngi saltanaty qazylar alqasynyń tóraǵasy Aıtjan Toqtaǵan bastaǵan ádil qazylarǵa degen erekshe qurmetpen túıindeldi. Astana men Almatydan kelgen óner maıtalmandaryna aýdan ákiminiń arnaıy alǵyshaty tabystalyp, uly ónerdiń ulyqtalǵan keshi el esinde máńgi qalatyndaı bolyp tarıh qoınaýyna endi.
