BQO-da UBT tapsyrýǵa bara jatqan oqýshylardy traktormen tasymaldaǵan

ORAL. KAZINFORM — Áleýmettik jelide UBT tapsyrýǵa bara jatqan oqýshylardy traktor tirkemesimen tasymaldaǵany jóninde beınejazba tarady.

Bókeı ordasy aýdany ákimdiginen málim etkenindeı, oqıǵa 17 naýryz kúni Muratsaı aýylynda bolǵan. Ákimdikten túsken málimetke qaraǵanda, A.Qusaıynov atyndaǵy mekteptiń bir top oqýshylaryn Oral qalasyna aqyly testileýge qatystyrý úshin balalardyń ata-analary Muratsaı aýylynan respýblıkalyq Saıqyn-Ónege-Oral jolyna deıin jetkizýge jeke tulǵamen kelisken. Traktor kóligimen júretindigi týraly jergilikti ákimdikti jáne polıtsııa bólimin eskertpegen. Barlyq oqýshylar Oral qalasyna aman-esen jetken.

«Bul jáıt boıynsha aýyl ákimdigi, mektep basshylyǵy jáne kólik ıesiniń jaýapkershiligin qarastyrý boıynsha másele qaralyp jatyr. Aýyl ákimi, mektep dırektory jáne ýchaskelik ınpektordan túsinikteme alyndy. Sońǵy kúnderi qar erip, oǵan qosa jańbyr jaýyp, kún raıy kúrt buzyldy. Sol sebepti de Muratsaı aýylynan respýblıkalyq Saıqyn-Ónege-Oral jolyna deıingi aýdandyq joldyń jaǵdaıy nasharlady. Atalǵan 18 shaqyrym kirme joldy kúrdeli jóndeýden ótkizý úshin jobalyq-smetalyq qujattama daıyndaldy, jumystardy bastaý úshin bıýdjetten tıisti qarajat bólindi. Qazirgi tańda merdigerdi anyqtaý boıynsha konkýrs ótkizilýde. Jobany 2024-25 jyldary júzege asyrý josparlanýda», - dep habarlady Bókeı ordasy aýdany ákimdiginen.