BQO-da tutynýshylarǵa 13,7 mln astam teńge keri qaıtaryldy
ORAL. KAZINFORM — BQO boıynsha saýda jáne tutynýshylardyń quqyqtaryn qorǵaý departamentine jyl basynan beri turǵyndardan 498 ótinish tústi.
Departament basshysynyń orynbasary Rýslan Ihsanovtyń óńirlik kommýnıkatsııalar qyzmeti alańynda ótken brıfıngte málim etkenindeı, qaralǵan ótinishterdiń nátıjesinde tutynýshylarǵa 13 mln 733,311 myń teńge kóleminde qarajat qaıtaryldy.
Onyń sózine qaraǵanda, ótinishterdiń 275-i oń sheshildi. 223-i boıynsha túsindirme berildi.
— Shaǵymdardyń 260-y nemese basym bóligi bólshek saýda salasyna tıesili, bul — jalpy sanynyń 52,2 paıyzy. Kóbine taýardy qaıtarýdan nemese almastyrýdan bas tartý, sapaǵa qatysty máseleler tirkeldi. Elektrondy saýda boıynsha 59 ótinish tústi (11,8 paıyz). Negizgi túıtkil — taýar sıpattamasynyń sáıkes kelmeýi, satýshy týraly aqparattyń bolmaýy jáne aqshany qaıtarýdaǵy qıyndyqtar, — dedi R.Ihsanov.
Onyń aıtýynsha, turmystyq qyzmetter salasynda 51 ótinish (10,2 paıyz) boldy. Bul jıhaz daıyndaý, jóndeý, qurylys, sulýlyq salondary men turmystyq qyzmet kórsetý sapasyna qatysty.
Sondaı-aq turǵyn úı-kommýnaldyq sharýashylyq salasy boıynsha 71 ótinish tirkeldi. Negizgi shaǵymdar tarıfterdiń ósýi men kommýnaldyq qyzmetterdiń sapasyna baılanysty boldy. Oǵan qosa qoǵamdyq tamaqtandyrý, týrızm jáne baılanys salalary, bilim berý, medıtsınalyq, qarjylyq jáne kóliktik qyzmetter boıynsha 90 ótinish qaraldy.
Departamentke túsken 355 ótinish ózge ýákiletti memlekettik organdardyń quzyreti sheginde qaraýǵa joldandy. Atap aıtqanda, bul salyq jáne qarjy zańnamasynyń buzylýy, tutynýshylardy aldaý faktileri, turǵyn úı qatynastary, baılanys, týrızm jáne kóliktik qyzmetter salalaryna qatysty.
2026 jyly departament 54 ákimshilik shara qabyldap, nátıjesinde 54 bıznes sýbektisine 1 mln 401,498 myń teńge aıyppul salyndy.
Departament 12 sot otyrysyna úshinshi tarap retinde qatysyp, 6 mln 753,354 myń teńge tutynýshylarǵa qaıtaryldy.
— Taǵy bir aıta ketetin jaıt, tutynýshylar elektrondy saýda jáne Instagram jelisi arqyly basqa qalalardan taýar men qyzmetke tapsyrys berýde. Osy rette tutynýshylar quqyǵynyń buzylý jaǵdaıy jıi kezdesedi. Mundaı shaǵymdar satýshylar, oryndaýshylardyń mekenjaıy boıynsha saýda jáne tutynýshylardyń quqyqtaryn qorǵaý departamentterine joldanady. Alaıda kóp jaǵdaıda tutynýshylar taýarǵa tapsyrys bergende, satýshylardyń mekenjaıy men baılanys aqparatyn aldyn ala bilmeıdi, ıaǵnı taýar men satýshy týraly aqparatqa mán bermeıdi. Sonyń saldarynan taýar sapasy nemese ony qaıtarý máseleleri boıynsha narazylyqtar týyndap, bul keıde qıyndyqtarǵa soqtyrady ári ınternet-saýdada aldanyp qalý qaýpi bar. Sondyqtan tutynýshylar taýar nemese qyzmetke tapsyrys berer aldynda satýshynyń meken-jaıy men baılanys telefondaryn, taýar nemese qyzmettiń sapasyna qatysty pikirlerdi aldyn ala tekserip, satýshydan nemese oryndaýshydan sol týraly tolyq aqparat alýy qajet, — dep qosty departament basshysynyń orynbasary.
Eske sala keteıik, budan buryn BQO-da ónim jetkizýshiniń balabaqshalarǵa maıdyń baǵasyn eki esege qymbatqa satqanyn jazǵan bolatynbyz.