BQO-da tutynýshy quqyǵyn buzǵan kásipkerge 1,5 mln astam teńge aıyppul salyndy

ORAL. KAZINFORM – Bórli aýdandyq soty tutynýshylardyń quqyqtaryn qorǵaý salasyndaǵy shartty buzý, aqshalaı qarajattardy óndirý, aıyppul men moraldyq zııannyń ornyn toltyrý týraly azamattyq isti qarady.

BQO sotynyń baspasóz qyzmetinen málim etkenindeı, Ch. degen talapker jeke kásipkermen qyzmet kórsetý týraly shartty buzý, as úı garnıtýrasy úshin tólengen 941,8 myń teńgeni, mindettemelerdi oryndaý merziminiń buzylýyna baılanysty aıyppul jáne moraldyq zııandy óteýdi óndirý týraly talap-aryzben júgingen.

Sotta anyqtalǵandaı, 2022 jyldyń 10 jeltoqsanynda taraptar arasynda as úı garnıtýrasyn daıyndaý jáne ornatý týraly shart jasalǵan. Kelisimshartqa sáıkes jumystardy oryndaý merzimi 30-45 kúntizbelik kún bolyp belgilengenimen, merdigerdiń mindettemeleri merzimderi buzyla otyryp oryndalǵan. Sonymen qatar daıyndalǵan buıymda kóptegen kemshilikter anyqtalyp, talapkerdiń ótinishterine qaramastan, olar joıylmaǵan.

- Sot is materıaldaryn zertteı kele, jaýapker shart boıynsha óz mindettemelerin tıisti túrde oryndamaǵan, bul tutynýshynyń Qazaqstan Respýblıkasynyń zańnamasynda bekitilgen quqyqtaryn buzǵan degen qorytyndyǵa keldi. Sot taraptar arasyndaǵy shartty buzyp, jaýapkerden talapkerdiń paıdasyna taýar úshin tólengen qarjyǵa qosa, qyzmet kórsetý merzimin buzǵany úshin aıyppuldy, moraldyq zııandy óteý jáne sot shyǵyndaryn óndirý týraly sheshim qabyldady. Aıyppuldyń jalpy somasy 1,5 mıllıon teńgeden asady. Sot sheshimi zańdy kúshine engen joq, - dep habarlady vedomstvodan.

Eske sala keteıik, budan buryn BQO-da sot talaptaryn oryndamaǵan departamentke shara qoldanylǵanyn jazǵan edik.