BQO-da turǵynnyń qora-qopsysy men maly órtenip ketti
ORAL. QazAqparat - Bókeı ordasy aýdanynda órt oqıǵasynan bir úıdiń maly men qora-qopsysy órtenip ketti, dep habarlaıdy «QazAqparat» tilshisi.
Aýdandyq tótenshe jaǵdaılar bóliminiń bas mamany, azamattyq qorǵaý aǵa leıtenanty Baqtııar Katchekovtiń aıtýynsha, Saraljyn aýylynda S.Datuly kóshesindegi №3/1 mekenjaıyndaǵy órt saldarynan 5 bas iri qara men jıyrma shaqty usaq mal jáne 70 býma shóbi otqa oranǵan.
Saraljyn aýyldyq okrýginiń ákimi Núrken Sabyrovtyń sózine qaraǵanda, mal ıesiniń qazir 4 baspaǵy, 5-6 qoıy ǵana qaldy. Oǵan kórshisi qora-qopsysynan oryn berip, shópten kómektesýde. Sharýa qojalyqtary men eldiń azamattary da qolushyn sozatyn bolady.
«Órt oqıǵasyna baılanysty zerthanaǵa synama alyndy, sarapshy maman da keletin bolady. Sondaı-aq aýdandyq ishki ister bóliminiń qyzmetkerleri tergeý sharalaryn júrgizýde. Ótken jyldyń 25 qarashasynda osy aýylda 6-7 býma shóp órtengen bolatyn. Sondyqtan bul qasaqana qoıylǵan ot pa, sonyń bári anyqtalýda», dedi «QazAqparat» tilshisine N.Sabyrov.
Eske sala keteıik, ótken jyly jazda daladaǵy órt saldarynan osy aýdanǵa qarasty Saıqyn aýyldyq okrýginde 25 bas iri qara jáne 250 orama, 1,5 myń taılap býylǵan shóp janyp ketken bolatyn. Tabıǵı órttiń kóbeıýine baılanysty sol kezde atalmysh okrýgte tótenshe jaǵdaı jarııalanǵan edi.
Illıýstratsııalyq foto
