BQO-da turǵyndardy malǵa teńegen aýyl ákimine sógis berý usynyldy

ORAL. QazAqparat – BQO boıynsha ádep jónindegi keńes otyrysynda Báıterek aýdany Mahambet aýyldyq okrýginiń ákimi Beıbit Amanǵalıevtiń tártiptik isi qaraldy, dep habarlaıdy QazAqparat tilshisi.

Keńes otyrysynda málim bolǵanyndaı, B.Amanǵalıevtiń jýrnalıspen suhbat kezinde «Halyqty nesine tyńdaısyńdar ? Halyq qazir mal bolyp ketti ǵoı» degen sózi áleýmettik jelide tarap ketken.

Osylaısha, B.Amanǵalıev turǵyndardy malǵa teńep, memlekettik qyzmetshiniń Ar-namys kodeksin buzǵan. Degenmen Báıterek aýdany ákimi apparaty bergen qyzmettik minezdemede onyń tártiptik jazasy joq, saýatty maman, isker basshy ekendigi kórsetilgen. Sondaı-aq turǵyndardan aýyl ákimin jaqsy qyrynan sıpattaǵan hat ta túsken.

B.Amanǵalıev keńes otyrysynda bul jaǵdaıdyń ótken jyly 7 jeltoqsanda oryn alǵandyǵyn, Mahambet aýylynyń sol kúni elektr jaryǵynsyz, al Gorbýnov pen Pavlov eldi mekenderiniń gazsyz qalǵandyǵyn aıtty. Sondaı qıyn sátte ańdaýsyz aıtyp qalǵanyn, sol úshin turǵyndar aldynda keshirim suraǵanyn jetkizdi.

«Tártiptik isti qaraý nátıjesinde B.Amanǵalıevke sógis berý týraly usynym Báıterek aýdany ákimine joldandy», dep habarlady ádep jónindegi keńesten.