BQO-da turǵyndardy 9,2 mln teńgege otyrǵyzyp ketken alaıaq sottaldy
ORAL. QazAqparat – Batys Qazaqstan oblysynda 11 adamdy 9,2 mln teńgege otyrǵyzyp ketken alaıaq sottaldy, dep habarlaıdy QazAqparat tilshisi.
BQO prokýratýrasynyń baspasóz qyzmetinen túsken málimetke qaraǵanda, S. esimdi alaıaq 2017 jyldyń mamyry men bıylǵy jyldyń maýsymy aralyǵynda qylmystyq is-áreketin júzege asyrǵan.
Ol syıaqyǵa Aqsaı qalasyndaǵy sheteldik kompanııalarǵa jalaqysy joǵary jumysqa ornalastyra alatynyn aıtyp, azamattardy aldaǵan. Mysaly, alaıaq balasyn «KPO b.v.» kompanııasynyń kólik bólimine qyzmetke ornalastyramyn dep, M. esimdi azamatshanyń 1,4 mln teńgesin jymqyryp ketken.
Keıbir azamattar oǵan aqsha berý úshin bankten nesıe alǵan.
Bórli aýdandyq sotynyń úkimimen S. QR QK 190-babyna (alaıaqtyq) sáıkes aıypty dep tanylyp, oǵan probatsııalyq baqylaý belgilenýmen birge 2 jylǵa bas bostandyǵy shektelip, 100 saǵatqa májbúrli eńbekke tartyldy.
Jaza taǵaıyndalǵan kezde onyń shyn ókinýi, zalaldy ishinara óteýi jáne buryn sottalmaǵandyǵyy eskerildi.
Jábirlenýshilerdiń talap-aryzdary tolyq qanaǵattandyryldy.
Sot úkimi zańdy kúshine endi.
