BQO-da turǵyn úılerdi iske qosý 9,1 paıyzǵa artty – Ǵalı Esqalıev
ORAL. QazAqparat – Batys Qazaqstan oblysynda ótken jyldyń qorytyndysy boıynsha ónerkásip óniminiń kólemi 3,7, qurylys jumystary 0,3, turǵyn úılerdi iske qosý 9,1paıyzǵa artty. Bul týraly óńir turǵyndarymen eseptik kezdesýinde oblys ákimi Ǵalı Esqalıev málim etti, dep habarlaıdy QazAqparat tilshisi.
Óńir basshysynyń aıtýynsha, gaz óndirý kóleminiń 6,8, gaz kondensatynyń 6,9 paıyzǵa ósýi esebinen ónerkásip kólemi 3,7 paıyzǵa ulǵaıdy.
Pandemııaǵa qaramastan, zaýyt-kásiporyndarda óndiris toqtaǵan joq, jańa ónimder shyǵarylyp, ınnovatsııalar men tyń tehnologııalar engizildi.
Mańyzdy salanyń biri – turǵyn úı qurylysy. Ótken jyly jalpy aýdany 529 myń sharshy metr 4838 páter iske qosyldy. Sonyń ishinde 527 páter kezekte turǵandarǵa, sonyń ishinde 53-i kóp balaly otbasylarǵa berildi.
«2021 jyly Oral men Aqsaı qalalarynda kezekte turǵandar úshin 1126 páter salý kózdelýde. Baspana alǵysy kelgen turǵyndar www.uralsk.smartmap.kz saıttarynda Oral qalasynda boı kóterip jatqan kóppáterlik turǵyn úıler týraly aqparat ala alady. Aldaǵy kóktemde «Aqjaıyq» shaǵynaýdanynda turǵyn úıler qurylysy bastalady.
Qazirdiń ózinde eki jergilikti ınvestor iske kiriskeli otyr. Basqa aımaqtardan da nıet bildirip jatqandar bar. Sondaı- aq bıyl jeke úı qurylysy úshin Qaratóbe, Fedorov jáne Krýgloozernyı kentinde 1800 jer telimin berý josparlanýda», dedi Ǵ.Esqalıev.
Onlaın túrde ótken kezdesý barysynda óńir basshysy ár saladaǵy atqarylǵan jumystar men Memleket basshysynyń tapsyrmasyna sáıkes alda turǵan mindetterge toqtaldy.
