BQO-da turǵyn úı órtenip, jas otbasy baspanasyz qaldy
BQO TJD baspasóz qyzmetinen málim etkendeı, oqıǵa Terekti aýdany Jańaómir aýylynda boldy.
«31 shilde kúni saǵat 18:51-de Uly dala kóshesi, 15-úı mekenjaıynda eki páterlik turǵyn úıde órt shyqty. №1 páterde jıhaz, jeke zattar jáne úıdiń tóbesi jandy. Órt 60 sharshy metr aýmaqty qamtydy. Adamdar aman. «Tilsiz jaý» saǵat 20:19-da oqshaýlanyp, 1 tamyz saǵat 1.16-da aýyzdyqtaldy», - dep habarlady vedomstvodan.
Osy úıde japsarlas páterde turatyn Almagúl Ómirǵalıevanyń aıtýynsha, órt saldarynan 30 jastaǵy kórshisi Syrymbek Saılaýov kelinshegi jáne úsh kishkentaı balasymen baspanasyz qaldy. Eki jasar balasy - múgedek, kishisi - úsh aılyq. Qazirgi kezde jas otbasy ýaqytsha ata-enesiniń úıinde turyp jatyr.
«Meniń úıim de apatty jaǵdaıda, turýǵa jaramsyz bolsa da, bala-kelinimmen birge panalap otyrmyz. Onyń ústine, mynadaı kúıge tap boldyq. Qabyrǵalardyń jarylǵan jerinen tútin kirip, ıis alyp ketti. Jergilikti atqarýshy organdardan kómek kútemiz», - dedi QazAqparat tilshisine A. Ómirǵalıeva.
Eske sala keteıik, budan buryn Shalqar kóline barǵan 38 jastaǵy áıeldiń sýǵa kete jazdaǵanyn jazǵan bolatynbyz.
