BQO-da turǵyn úı irgesinen adam súıekteri tabyldy
ORAL. QazAqparat - Batys Qazaqstan oblysynda turǵyn úıdiń irgesinen adam súıekteri tabyldy, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, oqıǵa 29 qazan kúni Bórli aýdany Prıýralnyı aýylynda bolǵan.
Sý qubyryn tartý úshin qazý jumystary kezinde úıdiń irgesinen adamnyń basy men súıekteri shyqqan. Qazirgi tańda adam súıekteri sot-medıtsınalyq saraptamaǵa jiberildi.
BQO tarıh jáne arheologııa ortalyǵynyń aǵa ǵylymı qyzmetkeri, tarıh ǵylymdarynyń doktory, professor Murat Sydyqovtyń aıtýynsha, ol jerde qansha adamnyń jerlengeni ázirge belgisiz. Bulardyń jerlengenine 100, ári ketkende, 150 jyl bolǵan. Naqty ýaqyty saraptama qorytyndysynan keıin anyqtalady.
