BQO-da turǵyn 80 jyl boıy qujatsyz júrgen
ORAL. QazAqparat - Burynǵy Orda aýdany (qazir Bókeı ordasy) Talap aýyldyq keńesinde týyp-ósken, 1952 jyly qazirgi Aqjaıyq aýdany Alǵabas aýylyna kelip, qonys tepken S. degen áıel adam 80 jyl boıy jeke basyn kýálandyratyn qujatsyz ómir súrgen.
Jýrnalıst Bolat Esqalıevtiń habarlaǵanyndaı, atalǵan turǵyn oblys jáne aýdan ákimdikterine, ádilet basqarmasynyń bólimderine júgingende, ózine qatysty týý týraly jazba joq ekendigi jaıynda jaýap alǵan. Aqyry onyń qyzy Aqjaıyq aýdanynyń prokýratýrasyna anasynyń jeke basyn anyqtaıtyn qujat alýǵa jáne zeınetaqy rásimdeýge kómek kórsetý týraly ótinishpen júgingen edi.
Aýdan prokýratýrasynyń qyzmetkerleri osyǵan baılanysty birqatar jumys atqardy. 1930 jyldan bastap muraǵattyq qujattar zerdelenip, S-nyń boljamdy jasyn anyqtaý úshin medıtsınalyq klınıkalyq tekserý júrgizilip, aýdandaǵy Alǵabas aýyldyq okrýgi aqsaqaldarynyń qatysýymen jınalys ótkizilip, onda qajetti kýálardyń jaýaptary jazylyp, S-nyń týý týraly deregi boıynsha taǵy da basqa is-sharalar ótkizildi.
«Aýdan prokýratýrasy Aqjaıyq aýdandyq sotyna S-nyń týý týraly zańdyq mańyzy bar deregin anyqtaý úshin talap-aryz berdi. 20 qyrkúıekte aýdan prokýrorynyń talaby qanaǵattandyryldy, atap aıtqanda, S-nyń 1936 jylǵy 16 naýryzda dúnıege kelgeni týraly zańdyq deregi anyqtaldy. Aqjaıyq aýdandyq sotynyń sheshimi kúshine engennen keıin ol týý týraly kýáligin, jeke kýáligin ala alady jáne jasyna baılanysty zeınetaqy rásimdeı alady»,- dedi Aqjaıyq aýdandyq prokýratýrasynyń prokýrory Anastasııa Semılıdı.
Aıta keteıik, 1952 jyly jeriniń edáýir bóligi áskerı polıgonǵa berilýine baılanysty Orda aýdany taratylyp, halqy Ońtústik Qazaqstan oblysyna jáne basqa jerlerge zorlyqpen kóshirilgen bolatyn. Sonyń ishinde Reseı asyp, tentirep ketken turǵyndar da az bolǵan joq. Turǵyndardyń bir bóligi Batys Qazaqstan oblysynyń aýdandaryna qonys tepken edi. S-nyń da osy zulmattan zardap shekkendigi kórinip tur. Ol Alǵabas aýylyna kóship kelgennen keıin turmys qurǵan, qazir urpaqtarynyń ortasynda ǵumyr keshýde.
