BQO-da turǵyndarǵa dórekilik tanytqan sheneýnikter jaýapqa tartyldy
ORAL. KAZINFORM — Memlekettik qyzmet isteri agenttiginiń BQO-daǵy ádep jónindegi keńes otyrysynda birneshe másele talqyǵa tústi.
Qyzmettik tekserý barysynda anyqtalǵanyndaı, Bórli aýdany Keńtúbek aýyldyq okrýginiń ákimi Nurlan Ǵazıev ádep kodeksiniń talaptaryn buzǵan.
Atap aıtqanda, aýyl ákimi bıylǵy 10 mamyr kúni ortaq chatta turǵynǵa qatysty «Men seni jumyssyz qaldyramyn. Seniń tochkańdy jaýyp tastaımyn» degen habarlama jibergen.
Ádep jónindegi keńes músheleri Nurlan Ǵazıevke eskertý túrindegi tártiptik shara qoldaný qajet dep tapty.
Sol sekildi Bókeı ordasy aýdany jer qatynastary bóliminiń basshysy Rýslan Karınniń shilde aıynda turǵynǵa qatysty balaǵat sóz aıtqany belgili boldy.
Osyndaı teris qylyqqa jol bergen Rýslan Karınge qatań sógis berý týraly sheshim qabyldandy.
Ádep jónindegi keńes otyrysynda sondaı-aq BQO bilim basqarmasynda júrgizilgen sybaılas jemqorlyq táýekelderine syrtqy taldaý qorytyndylary qaraldy.
Bilim berý salasyndaǵy basqarý protsesterin jáne kadrlyq saıasatty jetildirý, ishki baqylaý tetikterin kúsheıtip, sybaılas jemqorlyqtyń aldyn alýǵa baǵyttalǵan is-sharalardy shıratý qajettigi atap ótildi.
Oǵan qosa departamenttiń sybaılas jemqorlyqqa qarsy monıtorıngi barysynda Bókeı ordasy aýdandyq bilim berý bóliminde «Sybaılas jemqorlyqqa qarsy is-qımyl týraly» Zań talaptarynyń saqtalýyna qatysty másele anyqtaldy. Atap aıtqanda, bólim basshysynyń tikeleı baǵynysynda jaqyn týysynyń eńbek qyzmetin jalǵastyrý deregi zerdelendi. Bul jaǵdaı boıynsha departament tarapynan qoldanystaǵy zańnama talaptaryna sáıkes tıisti sharalar qabyldanady.
Eske sala keteıik, budan buryn BQO-da avtokólikke masań kúıde otyrǵan aýyl ákimi qyzmetinen bosatylǵanyn jazǵan edik.
