BQO-da turǵyndardy 200 mln teńgege aldaǵan alaıaq ustaldy

ORAL. KAZINFORM — BQO PD krımınaldyq polıtsııa basqarmasynyń qyzmetkerleri turǵyndardy 200 mıllıon teńgege aldaǵan alaıaqty ustady, dep habarlaıdy Polisia.kz.

Batys Qazaqstan oblysy polıtsııa departamentiniń krımınaldyq polıtsııa basqarmasynyń qyzmetkerleri oblys ortalyǵynyń birneshe turǵynyn aldap, olardan 200 mıllıon teńgeden astam qarajat ıemdengen er adamdy ustady.

Kúdikti azamattarǵa joq bızneske aqsha salýdy usynyp, olardyń senimine kirgen. Ustalǵan alaıaq — Túrkistan oblysynyń 32 jastaǵy turǵyny ekeni anyqtaldy. Ol áleýmettik jeli arqyly bir áıelmen tanysyp, ózin iPhone smartfondaryn kóterme baǵamen kórshiles elderge qaıta satatyn kásipker retinde tanystyrǵan. Senimge kirgen alaıaq jábirlenýshige osy bıznestiń tıimdi ekenin aıtyp, oǵan aqsha salýdy usynǵan. Áıel oǵan eki páterin satyp, túsken qarajat pen jeke jınaqtaryn bergen. Nátıjesinde onyń shyǵyny 77 mıllıon teńgeden asqan.

Sonymen qatar alaıaqtyń qurbany bolǵan áıeldiń týystary men tanystary da onyń «tıimdi» ınvestıtsııa usynysyna senip, qarajattaryn bergen.

Qazirgi tańda kúdiktige qatysty alty epızod boıynsha tergeý amaldary júrgizilýde. Jalpy shyǵyn kólemi - 200 mıllıon teńgege jýyq.

Tergeý barysynda kúdikti aqshany jeke qajettilikterine jumsaǵany jáne býkmekerlik keńselerde uttyryp jibergeni anyqtaldy.

Kúdikti qamaýǵa alynyp, ýaqytsha ustaý ızolıatoryna qamaldy.

Polıtsııa qyzmetkerleri azamattardy qyraǵylyq tanytýǵa jáne qarjylyq ınvestıtsııalarǵa qatysty máselelerde beıtanys adamdarǵa senbeýge shaqyrady.