BQO-da turǵyndar joldyń nasharlyǵyn aıtyp narazylyq bildirdi
ORAL. KAZINFORM — Batys Qazaqstan oblysy Kaztalov aýdanynda aýyl turǵyndary Algaı-Jalpaqtal-Juldyz-Qarasý jolynyń Qabansaı atalatyn tusynda jınaldy.
Kaztalov aýdandyq máslıhatynyń depýtaty Serikbol Qademovtiń Facebook áleýmettik jelisindegi paraqshasynda málim etkenindeı, 12 eldi mekenniń júzdegen turǵyny BQO jolýshylar kóligi jáne avtomobıl joldary basqarmasy men merdiger «SSS STORY GROUP» JShS dırektory Salamat Sertekovtiń Jalpaqtal-Kómekshi baǵytyndaǵy jol kútimi boıynsha jumystaryna rıza emestigin alǵa tartty.
Onyń sózine qaraǵanda, memlekettik satyp alý portalynda bıylǵy tamyz aıynda atalǵan basqarma men merdiger arasynda 63 mln teńgege qosymsha shart jasalǵan. Bul shart boıynsha 2 shaqyrymǵa deıin qatqyl materıal tógilýi tıis edi.
— Jumysshylar materıaldyń 1 shaqyrymǵa ǵana jetkenin aıtty. Qalǵan jol sol kúıinde qalǵan. Sol sebepti turǵyndar Qabansaı tusynyń burynǵy qalpynan da nashar bolyp ketkenine narazy jáne tógilgen materıaldaryna kúmánmen qaraıtyndaryn aıtty. Jalpy, Salamat Sertekovtiń túrli ataýlarmen birneshe JShS-y bar. Oblystyń birneshe aýdanynda jol kútimine baǵyttalǵan kelisim-sharttary da az emes. Ondaǵy mlrd-qa jýyq aqsha — memlekettiń qarajaty. Endeshe, sol qarjyǵa jumys nege tıisti deńgeıde atqarylmaıdy? — deıdi depýtat.
S.Qademovtiń aıtýynsha, 2023 jyldyń sońynda oblys ákimi Narıman Tóreǵalıev Jalpaqtal aýyldyq mádenıet úıinde turǵyndarmen kezdesýinde jol kútimi boıynsha atqarylǵan jumystarǵa sol aýmaqtyń ákimi qol qoımaı, qarjy merdigerge tólenbeıdi degen edi. Alaıda atqarylǵan jumystar boıynsha aktilerde eshqandaı aýyl nemese aýdan tarapynan ákimderdiń qoldary bolmaı shyqty. Memlekettik satyp alý portalyndaǵy atqarylǵan jumys aktilerinde tek basqarma basshysynyń orynbasary men merdigerdiń ǵana qoly ǵana bar.
— Qabansaı jolyn jóndeý týraly usynys kópten beri aıtylyp keledi. Másele qazirgi oblys basshysynyń aldyna osymen úshinshi jyl qatarynan qoıyldy. Budan túıer túıin — halyq 14 shaqyrym joldy salýdy 2026 jyly bastalǵanyn surap otyr, — dep qosty S.Qademov. Osy máseleniń anyq-qanyǵyna kóz jetkizý maqsatynda Kazinform tilshisi BQO jolaýshylar kóligi jáne avtomobıl joldary basqarmasyna arnaıy saýal joldaǵan edi.
Basqarma basshysy Marat Qýanshalıev bergen málimetke qaraǵanda, oblystyq mańyzy bar Algaı-Jalpaqtal-Juldyz-Qarasý (6–170) avtomobıl jolynyń jalpy uzyndyǵy 164 km. 2024 jyldyń 30 qańtaryndaǵy № 13 kelisimshartqa sáıkes atalǵan avtomobıl jolyn kútip ustaý jumystaryn «SSS STORY GROUP» JShS atqarady. Kelisim-shart úsh jyl merzimge, 2026 jyldyń 31 jeltoqsanyna deıin jasalǵan, kelisimsharttyń jalpy somasy — 216 mln 298 myń 527,31 teńge.
Avtomobıl jolyn kútip-ustaý jumystaryna topyraq joldarynda júris bóligin profıldeý, oıyqtardy joıý, qardan tazartý, shóp pen butalardy shabý, jol belgilerin ornatý jáne aýystyrý, qoqys jınaý jáne basqalar kiredi.
— Bıylǵy tamyz aıynda jolaýshylar kóligi jáne avtomobıl joldary basqarmasy men «SSS STORY GROUP» JShS arasynda 63 mln teńgege qosymsha kelisim jasalǵan joq. 2025 jyly atalǵan avtomobıl jolyn kútip-ustaýǵa bólingen qarajat aıasynda «SSS STORY GROUP» JShS tarapynan Qabansaı aýmaǵynda uzyndyǵy 1 km bolatyn qıyrshyqtas-qum qospasyn tóseý jumystary oryndaldy. Basqarma qabyldaıtyn jáne memlekettik satyp alý portalynda ornalastyrylatyn oryndalǵan jumystardyń aktilerine aýyldyq okrýg ákimderi qarjylyq jaýapkershiligi bolmaǵandyqtan, qol qoımaıdy. Ákimderdiń qol qoıýy úshin tek oryndalǵan jumys kólemderi kórsetilgen bólek aktiler daıyndalady, — dedi M.Qýanshalıev.
Basqarma basshysynyń túsindirýinshe, 2022 jyly jobalaýshy mekeme «Ýralskıı Kazdorproekt» JShS Algaı-Jalpaqtal-Juldyz-Qarasý jolynyń 50-70 km jáne 70-90 km ýchaskelerin kúrdeli jóndeý boıynsha jobalyq-smetalyq qujattama ázirlegen bolatyn. Qarjylandyrýdyń bolmaýyna baılanysty bul jobalar iske asyrylmady.
— Jobalyq-smetalyq qujattamanyń qoldanylý merzimi bitti. Soǵan baılanysty bıylǵy 10 qyrkúıektegi № 13 kelisim-shart negizinde «Ýralskıı Kazdorproekt» JShS «Algaı-Jalpaqtal-Juldyz-Qarasý 6–104 km (70–90 km ýchaskesi) Kaztalov aýdany, Batys Qazaqstan oblysy» avtomobıl jolyn kúrdeli jóndeý boıynsha jobalyq-smetalyq qujattamany túzetý jumystaryn aıaqtaý ústinde. Bul jumys máresine jetkennen keıin atalǵan jobany iske asyrý úshin qarjy bólýge bıýdjettik ótinim joldanady, — dep qosty M.Qýanshalıev.
«SSS STORY GROUP» JShS dırektory Salamat Sertekovtiń naqtylaýynsha, 63 mln teńge — bir jylǵa uzyndyǵy 170 km Jalpaqtal-Juldyz-Qarasý jolyn kútip ustaýǵa bólingen qarjy.
— Bizdiń kelisim-shartqa jańbyrdan keıin qyryp tegisteý, qar tazalaý, jol belgilerin ornatý jumystary kiredi. Jumysty Jalpaqtal aýylyndaǵy tehnıkalarymyzben jergilikti qyzmetkerler atqarady. Mende bir ǵana JShS tirkelgen. Ol sonymen qatar Chapaev-Jańaqala-Saıqyn jolyn kútip ustaýmen aınalysady, — dedi S. Sertekov.
Eske sala keteıik, budan buryn Batys Qazaqstanda shalǵaı aýyldarǵa asfalt jol qashan salynatynyn jazǵan edik.