BQO-da turǵyndar aýyl mańynda jer qazý jumystaryna narazy

ORAL. KAZINFORM - Áleýmettik jelide Batys Qazaqstan oblysy Báıterek aýdany Baıqonys aýyldyq okrýginde jer qazý jumystarynyń júrgizilip jatqany jóninde beınejazba tarady.

Turǵyndardyń sózine qaraǵanda, beınejazba 14 aqpan kúni túste túsirilgen. Shabyndyq jerden shuńqyrdyń qazylýyna baılanysty aýyl adamdary narazylyq bildirgen.

Osy máselege baılanysty Baıqonys aýyldyq okrýginiń ákimi Almas Qońyrov túsinik berdi. 

Onyń sózine qaraǵanda, okrýg aýmaǵynda, Baıqonys aýylynan 1,5 shaqyrym jerde 13 aqpanda belgisiz adamdardyń shuńqyr qazyp jatqany anyqtaldy. Sol kúni ıAnvartsev orman jáne janýarlar dúnıesin qorǵaý jónindegi KMM qyzmetkerleri oqıǵa ornyna baryp, atalǵan jer telimi mekeme qaramaǵyna jatpaıtynyn rastady.

- Aýyldyq okrýg ákimdigi ýchaskelik polıtsııa qyzmetkerimen birge 14 aqpanda qaıta tekserý júrgizdi. Jer teliminde 1 ekskavator men 1 «KamAZ» tehnıkasy jumys istegen. Ekskavator qazyp, «KamAZ» topyraqty aınalasyna tókken. Ekskavator júrgizýshisinen túsinik alý barysynda ol bul jumystyń balyq aýlaý úshin júrgizilip jatqanyn aıtty. Keıin aýyl turǵyndary men jergilikti qoǵamdyq kelisim keńesiniń músheleri jınalyp, tehnıka ıesin shaqyrtty. Tehnıka ıesiniń aıtýynsha, jer ýchaskesiniń ıesi Mútıǵolla Irmenov shuńqyr qazýǵa ruqsat bergen, alaıda onymen baılanys ornatý múmkin bolmady, - deıdi Almas Qońyrov.

Anyqtalǵanyndaı, jer ıesi Mútıǵolla Irmenov 98 gektar jer ýchaskesine sharýa qojalyǵyn júrgizý úshin ıelik etedi. Aýyl turǵyndary jáne qoǵamdyq kelisim keńesi bul áreketke qarsylyq bildirip, jer áýelden shabyndyq retinde bólingenin jáne onsyz da mal baǵýǵa jer jetispeıtinin aıtyp, narazylyq tanytty. 

- Osyǵan baılanysty aýyl turǵyndary, jergilikti qoǵamdyq kelisim keńesiniń músheleri jáne ýchaskelik polıtsııa qyzmetkeri birlesip, qosymsha tekserý júrgizý jáne mán-jaıdy anyqtaý úshin jumysty toqtatty. Qazylǵan shuńqyrdyń kólemi shamamen – eni 15, uzyndyǵy 20 metr, tereńdigi – 2-3metr, - dedi aýyl basshysy.

Báıterek aýdanynyń ákimi Marat Toqjanov máseleni anyqtap, aýdan prokýratýrasymen birge zańdylyǵyn qarap, sheshim qabyldanatynyn jetkizdi.

Eske sala keteıik, budan buryn Oralda ýly topyraqpen bóget turǵyzylyp jatqanyna baılanysty ákimdik jaýap bergenin jazǵan bolatynbyz.