BQO-da turǵyn úıde edenniń astynan jylandar shyqty

ORAL. KAZINFORM — Batys Qazaqstan oblysy Terekti aýdany Aqjaıyq aýylynda turǵyn úıde edenniń astynan jylandar shyqqany jóninde beınejazba tarady. 

Turǵynnyń sózine qaraǵanda, oqıǵa 7 naýryz kúni Jeltoqsan kóshesi 5-mekenjaıda boldy. Edenniń astynan shyqqan jylandar sany 10-nan asyp ketken.

BQO tótenshe jaǵdaılar departamentiniń baspasóz qyzmeti oqıǵany rastady.

— Qutqarýshylar kelgenge deıin úı turǵyny edenniń astynan shyqqan 16 jylandy ózdiginen alǵan. Úıde 6 adam tursa, sonyń tórteýi — balalar. Úı ıesi edendi ashýǵa ruqsat bergen joq. Jergilikti atqarýshy organ otbasyna ýaqytsha basqa baspana bergen, — dep habarlady vedomstvodan.

Terekti aýdany Aqjaıyq aýyldyq okrýginiń ákimi Bolat Qadyralıevtiń naqtylaýynsha, qazirgi kezde atalǵan otbasy balalarymen birge jylý jáne jaryqpen qamtamasyz etilgen úsh qabatty jańa úıdiń bir bólmesinde ýaqytsha turyp jatyr.

Eske sala keteıik, budan buryn Oralda qalaǵa kirip ketken eliktiń beınejazbaǵa túsip qalǵanyn jazǵan bolatynbyz.