BQO-da tumaýǵa shaldyqqandar sany 8,9 ese ósti

ORAL. KAZINFORM – Batys Qazaqstan oblysynda bıylǵy bes aıda sanıtarlyq-epıdemıologııalyq ahýal turaqty boldy. 

BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkatsııalar qyzmeti alańynda ótken brıfıngte málim etkendeı, jyl basynan beri toptyq aýrýshańdyq, sondaı-aq tyrysqaq, qutyrý, oba, kúıdirgi, ish súzegi, qyzamyq, dıfterııa, polıomıelıt, serozdy menıngıt, sirespe jáne bezgek derekteri tirkelgen joq.

Nurlybek Ermekulynyń sózine qaraǵanda, ótken jyldyń osy kezeńimen salystyrǵanda, 17 juqpaly aýrý boıynsha kórsetkish tómendegen. Sonyń ishinde bakterıaldy dızenterııa – 2, kókjótel – 10, menıngokokk juqpasy – 2, irińdi menıngıt – 1, jiti A vırýsty gepatıti – 6, jiti V vırýsty gepatıti – 5, saryp 8 jaǵdaıǵa, qyzylsha – 63,8, koronavırýstyq ınfektsııa 4,47 esege azaıdy. 

Sondaı-aq jiti ishek ınfektsııalarynyń toby – 33,28, skarlatına – 16,4, JRVI – 11,34, opıstorhoz – 22,3, pedıkýlez – 15,19, týberkýlez 27,6 paıyzǵa kemidi. 

– Sonymen qatar oblysta birqatar juqpanyń óskeni baıqaldy. Epıdemııalyq parotıt 1 jaǵdaıǵa kóterilse, tumaý – 8,9, jelsheshek 31,14 esege kóbeıdi. Barlyq aýa tamshy jolymen beriletin aýrýlardyń aldyn alý úshin saqtyq sharalaryn umytpaý kerek. Aýyra qalǵan jaǵdaıda adam ózin-ózi emdemeı, ýaqtyly medıtsınalyq kómekke júginip, dárigerdiń nusqaýy boıynsha em qabyldaý qajet, - dedi N.Mustaev. 

Onyń aıtýynsha, óńirde týberkýlezdiń belsendi túrine shaldyqqan 93 naýqas tirkelip, aýrýshańdyq kórsetkishi 100 myń turǵynǵa shaqqanda, 13,4 bolyp, ótken jylǵy osy kezdegiden (135) 31,6 paıyzǵa tómendegen. Balalar arasyndaǵy aýrýshańdyq (9) ótken jylǵy deńgeıde qaldy. 

Eske sala keteıik, budan buryn BQO-da kıik batyp ólgen ózen sýy ishýge jaramdy ma, sony jazǵan bolatynbyz.