BQO-da toı úshin jalǵa beriletin kottedjder tekserilýde
ORAL. QazAqparat – Oral qalasynda toı ótkizetin kottedjder de tekserilip jatyr, dep habarlaıdy QazAqparat tilshisi.
Oral qalasy ákimi apparaty aqparattyq tehnologııalar jáne memlekettik qyzmet kórsetý monıtorıngi bóliminiń basshysy Aslan Jarmuhanovtyń Óńirlik kommýnıkatsııalar qyzmeti alańynda ótken brıfıngide málim etkenindeı, shaharda barlyǵy 50-70-ke jýyq kottedj túrli sharalar ótkizýge jalǵa beriledi.
Sonyń ishinde onshaqty iri kottedj toı-dýman ótkizýmen aınalysady. Jýyrda toı ótkizgen eki kottedj anyqtaldy.
Jalpy, BQO bas memlekettik sanıtar dárigeriniń qaýlysyna sáıkes engizilgen shekteý sharalarynyń saqtalýyn qadaǵalaý maqsatynda kóptegen nysandarǵa monıtorıngtik tekserý jumystary júrgizilýde.
Qazan aıynda nysandardy monıtorıngileý barysynda shekteý sharalaryn buzýshylyqtyń 77 deregi anyqtaldy.
Oral qalasy boıynsha 170-ten astam nysan monıtorıngilik toptardyń baqylaýynda tur.
«Qazirgi tańda kópshilik is-sharalar uıymdastyrý, jıyn-toı ótkizý azaımaı tur. Іs-sharany uıymdastyrýshylar men toı ıeleri aıyppul tólegennen keıin jıyndy ári qaraı jalǵastyrýdy suraıdy. Shyn máninde monıtorıngtik toptardyń maqsaty kóp adamnyń jınalýyna jol bermeý bolyp tabylady. Óıtkeni mundaı jerlerde aýrýdy juqtyrý qaýpi joǵary. Búginde qaıtalanǵan quqyq buzýshylyq derekteri jıi kezdesip otyr. Mundaı jaǵdaıda nysandy sot sheshimimen toqtatýǵa deıin shara qoldanylady», dedi A.Jarmuhanov.
