BQO-da tótenshe jaǵdaılarǵa 1,3 mlrd teńge qaralyp otyr
ORAL. QazAqparat - Batys Qazaqstan oblysynda bıyl tótenshe jaǵdaılarǵa 1,3 mlrd teńge qaralyp otyr. Bul týraly búgin óńirlik kommýnıkatsııalar qyzmetinde kóktemgi sý tasqynyna baılanysty ótken brıfıngte málim etildi, dep habarlaıdy «QazAqparat» tilshisi.
«Qazgıdromet» RMK BQO fılıalynyń dırektory Nurjan Shııaptyń aıtýynsha, qysta qar az boldy. Topyraq qabatynyń qatý tereńdigi aqpan aıynyń ekinshi onkúndiginde Tasqala aýdanynda 53, Shyńǵyrlaýda 130 santımetrge jetti. Qardyń tyǵyzdyǵy men bıiktigi, sý qory ótken jylǵydan 1,5-2 esege tómen. Alaıda oblystyń Derkól, Shaǵan sııaqty shaǵyn ózenderinde muz ótken jylǵydan qalyń. Sondyqtan ýaqtyly sharalar alynbasa, muz keptelip qalýy yqtımal. 26 aqpandaǵy málimet boıynsha Orynbor oblysyndaǵy Irıkla sý qoımasynan Jaıyqqa sekýndyna 20 tekshe metr (2017 jyly - 25 tekshe metr) sý jiberilýde.
BQO TJ departamentiniń bastyǵy, general-maıor Jasulan Jumashevtiń málim etkenindeı, ótken jyly tótenshe jaǵdaılarǵa rezervte 978 mln teńge qaralsa, bıyl 1,3 mlrd teńgege jetip otyr. Departamentte 3 myńdaı adam jumyldyrylady. Inertti materıaldar, janar-jaǵar maı qory jetkilikti. Arnaıy muz kesetin apparat satyp alyndy. Muzdy jarǵannan góri ony kesken tıimdi, ekologııalyq jaǵynan da zalal keltirmeıdi. Sondaı-aq órt sóndirý mashınalary, avtobaspaldaq, 18 izdeý-qutqarý avtokóligi alyndy. Rezervte shatyrly qalashyq bar.
Óńirde 57 gıdrotehnıkalyq qurylym bolsa, sonyń bári túgendelip, jóndeý, qalypty ustaý baǵytynda sharalar alynýda.
Respýblıkalyq mańyzy bar joldarda sý ótkizetin 439 turba bar. Respýblıkalyq joldarda 37, oblystyq joldarda 54 sý ótýi múmkin jerler anyqtaldy.
«Oblys basshysynyń tapsyrmasyna sáıkes Oral qalasy ǵana emes, Bórli, Tasqala, Zelenov jáne basqa aýdandarda kóktemgi sý tasqynyna oraı ázirlik jumystary atqarylýda. Toń qalyń bolǵandyqtan, erigen qar sýy ýaqtyly ketpeı qalý qaýpi bar. Sondyqtan sý júretin aryqtardy tazalaý óz aldyna, aýlalardan qardy kúni buryn shyǵarý qajet. Qala mańyndaǵy saıajaılarda turatyndar da saq bolýy tıis. Óıtkeni bular ýaqytsha qurylys bolyp esepteletindikten, ótemaqy tólenbeıdi. Basqa da qyzmettermen birige otyryp, sý tasqynyn qaýipsiz ótkizý úshin barlyq sharalar alynatyn bolady», dedi J.Jumashev.
