BQO-da tótenshe jaǵdaı talabyn buzǵan aqtóbelik júrgizýshi qamaýǵa alyndy
ORAL. QazAqparat – Batys Qazaqstan oblysynda tótenshe jaǵdaı talabyn buzǵan aqtóbelik júrgizýshi qamaýǵa alyndy, dep habarlaıdy QazAqparat tilshisi.
BQO sotynyń baspasóz qyzmetinen túsken málimetke qaraǵanda, Aqtóbe qalasynyń turǵyny QR Ákimshilik quqyq buzý kodeksi 476-baby 6-tarmaǵyna sáıkes aıypty dep tanyldy.
Aqjaıyq aýdandyq №2 sotynyń qaýlysymen atalǵan turǵyn 3 táýlikke ákimshilik qamaýǵa alyndy.
Qaýly zańdy kúshine engen joq.
Sotta anyqtalǵandaı, aqtóbelik júrgizýshi 31 naýryz kúni saǵat 16.30 shamasynda «VAZ-21140» avtokóligimen Atyraý oblysy aýmaǵynan kele jatyp, Oral-Atyraý jolynyń boıynda ornalasqan №6 tosqaýyl beketin dala jolymen aınalyp ótken. Sodan keıin Aqjaıyq aýdany Taıpaq aýyldyq okrýgine qarasty Shabdarjap aýylyna kirgen.
Osy áreketimen júrgizýshi oblys aýmaǵynda koronavırýstyńń taralýyna jol bermeý jónindegi sharalardy kúsheıtý týraly BQO bas memlekettik sanıtar dárigerdiń 30 naýryzdaǵy qaýlysynyń 1.1 jáne 1.3-tarmaqshalaryn buzǵan.
Sot otyrysynda aıyptalýshy E. óz kinásin moıyndady.
Eske sala keteıik, budan buryn Oralda koronavırýspen kúres sharalaryna 94 mln teńge bólingenin, BQO-da myńnan astam adam baqylaýda ekenin jazǵan bolatynbyz.
