BQO-da tótenshe jaǵdaı talabyn buzǵan 100-den astam adam qamaýǵa alyndy
ORAL. QazAqparat – Batys Qazaqstan oblysynda tótenshe jaǵdaı talabyn buzǵan 102 adam ákimshilik qamaýǵa alyndy, dep habarlaıdy QazAqparat tilshisi.
Oblys sottaryna 16 naýryzdan beri 164 is tústi.
BQO sotynyń baspasóz qyzmetinen túsken málimetke qaraǵanda, sonyń ishinde 102 adam qamaýǵa alynsa, 50 adamǵa aıyppul salyndy. Eki ákimshilik is qysqartylsa, eki adamǵa eskertý berildi. 8 is keıinge qaldyryldy.
Mysaly, Jańaqala aýdany Jańajol aýylynyń tórt turǵyny asa qajettilik bolmasa da, 8 sáýir kúni túngi saǵat 00.30 shamasynda jeke avtokólikpen kórshiles Qaztalov aýdany Qarasý aýylyna barǵan. Ári alkogoldi ishimdik iship júrgen.
Qaztalov aýdandyq №2 sotynyń qaýlysymen QR Ákimshilik quqyqbuzýshylyq kodeksi 1, 6, 9-tarmaqtaryna sáıkes bulardyń árqaısysy 7 táýlikke qamaldy.
Sol sekildi Shyńǵyrlaý aýdanynyń tórt birdeı turǵyny tótenshe jaǵdaıdyń jarııalanǵanyna qaramastan, óz úılerinen shyǵyp, eshbir sebepsiz aýyl ishinde serýendegen.
Shyńǵyrlaý aýdandyq sotynyń qaýlysymen bul tórteýdiń árqaısysy QR Ákimshilik quqyqbuzýshylyq kodeksi 476-baby 6-tarmaǵyna sáıkes 3 táýlikke qamaldy.
Sondaı-aq Tasqala aýylynyń K. degen turǵyny 3 sáýir kúni saǵat 22.30 shamasynda «VAZ-21083» avtokóligimen óziniń turǵylyqty mekenjaıynan 2 kılometr qashyqtyqtan asyp ketken. Ol «TrueConf» mobıldik qosymshasy arqyly ótkizilgen sot otyrysynda kinásin moıyndap, avtokóligimen dosyna baryp kele jatqanda, polıtsııa qyzmetkerleriniń toqtatqanyn aıtty.
Bul turǵyn 5 táýlikke qamaýǵa alyndy.
Sot úkimderi kúshine engen joq.
