BQO-da tórtinshi toqsanda 115 oqýshydan koronavırýs tabyldy
ORAL. QazAqparat – Batys Qazaqstan oblysynda tórtinshi toqsanda 115 oqýshydan koronavırýs tabyldy. Bul týraly oblys ákimi Ǵalı Esqalıevtiń tóraǵalyq etýimen ótken jedel shtab otyrysynda aıtyldy, dep habarlaıdy QazAqparat tilshisi.
BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń málim etkenindeı, 1 sáýirden beri indet anyqtalǵan 115 oqýshynyń 39-y dástúrli túrde, 76-sy qashyqtan oqıdy.
Qala men aýdandar bas memlekettik sanıtar dárigerleriniń qaýlysyna sáıkes 18 mektepte 33 synyp, 9 balabaqshada 11, 1 orta arnaýly oqý ornynda 1 top karantınge jabyldy.
Jyl basynan beri óńirde koronavırýs juqtyrǵandar sany 7177-ge jetti.
Sáýir aıynda 1352 adamnan indet anyqtaldy. Aldyńǵy aptamen (30 naýryz – 5 sáýir, 725) salystyrǵanda, sońǵy jeti kúnde (6-12 sáýir, 821) aýrý juqtyrý kórsetkishi 11,6 paıyzǵa ósti.
Nurlybek Ermekulynyń sózine qaraǵanda, óńir úsh aptadan astam ýaqyt boıy «qyzyl» aımaqta tur. Oblystyń ishinde Oral qalasy, Aqjaıyq, Bórli, Báıterek, Qaztalov, Tasqala, Shyńǵyrlaý «qyzyl», Terekti, Bókeı ordasy, Jańaqala, Jánibek «sary», Syrym men Qaratóbe aýdandary «jasyl» aımaqta tur.
Aýyrǵandardyń 52,4 paıyzy (709) Oral qalasy, sondaı-aq 13,3 paıyzy (181) Báıterek, 13 paıyzy (176) Bórli aýdandarynyń úlesine tıedi.
Sáýirde indet juqtyrǵandarmen baılanysta bolǵan 2598 adam medıtsınalyq baqylaýǵa alyndy.
Osy aıda 26178 PTR zertteý (kúnine orta eseppen 2181) júrgizildi.
Oblystyq densaýlyq saqtaý basqarmasy basshysynyń mindetin atqarýshy Arman Qalıbekovtiń aıtýynsha, óńirde jyl basynan beri koronavırýstan 89 adam kóz jumdy.
Sonyń ishinde qańtarda – 28, aqpanda – 15, naýryzda – 30, sáýirde 16 adam ómirden ozdy. Olardyń 48-i – áıelder, 41-i – er adamdar. Qalada 79, aýdandarda 10 adam qaıtqan.
«Іndetten qaıtys bolǵandardyń deni, ıaǵnı 73 paıyzy – 65 jastan asqandar, 26 paıyzy – 40-65 jastaǵylar, 1 paıyzy – 40 jasqa deıingiler. Sonymen qatar 95 paıyzynyń (82 adamnyń) sozylmaly aýrýy bolǵan. Bylaısha aıtqanda, 71 paıyzy júrek-qan tamyrlary, 13 paıyzy qant dıabetine, 8 paıyzy basqa dertke shaldyqqan. Epıdemıologııalyq ahýaldyń nasharlaýyna jol bermeý úshin barlyq turǵyndardy karantındik talaptardy saqtaýǵa shaqyramyn», dedi A.Qalıbekov.
Oblys ákimi Ǵ.Esqalıev basqa óńirlermen salystyrǵanda, BQO-da qaýipti jaǵdaıdyń qalyptasyp otyrǵanyn, qaıtys bolǵandar arasynda jasy ulǵaıǵan adamdardyń kóp ekendigin, sondyqtan saqtyq sharalaryn kúsheıtý, kópshilik jınalatyn jerlerge barmaý qajettigin atap kórsetti.
Eske sala keteıik, budan buryn Batys Qazaqstanda bir kúnde 3 myńnan astam adamnyń indetke qarsy egilgenin, bir aptada 821 adamnan koronavırýs tabylǵanyn jazǵan bolatynbyz.
