BQO-da tórt jylqyny atyp alǵan urylar qolǵa tústi
ORAL. QazAqparat - 22 jeltoqsan kúni saǵat 07.00 shamasynda Aqjaıyq aýdany Jańabulaq aýyldyq okrýgindegi ýchaskelik polıtsııa ınspektoryna bir turǵynnan aýyl janynan kúdikti aq tústi djıp avtokóliginiń ótip ketkendigi jóninde habarlama túsken, dep habarlaıdy QazAqparat HAA tilshisi.
BQO ІІD baspasóz qyzmetinen túsken málimetke qaraǵanda, osy aýyldyq okrýgte mal urlaný deregi tirkelgendikten, atalǵan ınspektor aýdandyq ishki ister bólimi arqyly jaqyn aýdandar men oblystyń jol-patrýldik polıtsııasy batalonynyń jeke quramyna jedel baǵyt-baǵdar bergen.
Polıtsııanyń kúshimen Oral-Atyraý kúre joly jáne Oral qalasyna baratyn barlyq joldar jabylyp, taıaý mańdaǵy eldi mekender tekserildi. Jedel izdestirý sharalary barysynda Oral-Atyraý jolynan 11 shaqyrym jerde ornalasqan Órken aýylynyń tusynda patrýldik avtokólikti kórip, jasyrynbaqshy bolǵan eki kúdikti ustaldy. Olar «Toıota Land Krýzer» avtokóligi men úshinshi kúdiktini qaıda qaldyryp ketkendigin aıtyp bergen. Bulardyń bári de 25-27 jastaǵy oblys turǵyndary bolyp shyqty. Avtokólikti teksergen kezde atylyp alynǵan tórt jylqynyń bólshektelgen eti, ishki ister organynda tirkelmegen ańshy myltyǵy tabylyp, tárkilendi. Avtokólik arnaıy turaqqa qoıyldy.
Jábirlenýshi men oǵan keltirilgen materıaldyq shyǵyn kólemi anyqtaldy.
Atalǵan derek boıynsha QR QK 188-baby 3-bólimine sáıkes (urlyq) qylmystyq is qozǵaldy. Kúdiktiler ýaqytsha ustaý ızolıatoryna qamalyp, qylmystaryn moıyndaý ústinde. Qazirgi ýaqytta olardyń oblys aýmaǵynda jasalǵan basqa qylmystarǵa qatysy bar-joǵy qosa tekserilýde.
