BQO-da tórt turǵyn 227 dana kıik múıizimen ustaldy
ORAL. QazAqparat – BQO-nyń Qaztalov aýdanynda tórt turǵyn 227 dana kıik múıizimen ustaldy, dep habarlaıdy QazAqparat tilshisi.
Aýdandyq polıtsııa bóliminen alynǵan málimetke qaraǵanda, oqıǵa 22 sáýir kúni túnde oryn aldy.
Saǵat 22.00-de kórshiles Jánibek aýdany turǵyndarynyń Qoshankól aýyldyq okrýgine qarasty Qarasý qystaǵy mańynda kıik múıizin satqysy kelip júrgendigi jóninde habar túsken.
Qaztalov jáne Jalpaqtal polıtsııa bólimi qyzmetkerlerinen jasaqtalǵan eki jedel tergeý toby oqıǵa ornyna dereý jetken. Atalǵan jerden 23 sáýir kúni saǵat 00.30-da eki avtokólik toqtatyldy. Avtokóliktegiler boı tasalamaq bolǵanymen, polıtsııa qyzmetkerlerinen sytylyp kete almady. Olardyń Jánibek aýdany Kúıgenkól aýylynyń tórt turǵyny ekendigi belgili boldy. Tekserý kezinde qos avtokólikten 227 dana kıik múıizi tabyldy.
Qazirgi kezde kúdiktilerge qatysty QR QK 339-baby 2-bólimi 2-tarmaǵyna (aldyn ala sóz baılasyp, adamdar tobymen ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) sáıkes qylmystyq is qozǵalyp, tergeý amaldary júrgizilýde.
Eske sala keteıik, budan buryn BQO-da aýyl turǵyny kıik múıizderimen ustalǵanyn jazǵan bolatynbyz.
