BQO-da tórt kúnde 1 500-den astam jol erejesin buzýshylyq anyqtaldy

ORAL. KAZINFORM — Batys Qazaqstan oblysynda jyl basynan beri 1 116 jol-kólik oqıǵasy bolyp, saldarynan 69 adam qaza tapty. 1 750 adam túrli dene jaraqatyn aldy.

BQO polıtsııa departamenti bastyǵynyń orynbasary Nurmahan Jalǵasovtyń málim etkenindeı, respýblıkalyq mańyzy bar Oral-Aqtóbe avtojoly qaýipti aımaq bolyp qalyp otyr.

Onyń sózine qaraǵanda, sońǵy kezde Oral-Aqtóbe baǵytynda 34 jol apatynan 11 adam kóz jumsa, 59-y jaraqat aldy.

Sondyqtan Oral-Aqtóbe jolynda jyldamdyqty anyqtaıtyn «KıberSherıf» jáne avtomattandyrylǵan jasyryn patrýl mobıldik keshenderimen qatar ushqyshsyz ushatyn apparat arqyly patrýldeý kúsheıtildi.

- Apattyq jaǵdaıdy tómendetý maqsatynda 18-23 qarasha aralyǵynda oblys aýmaǵynda «Qaýipsiz jol» respýblıkalyq jedel aldyn alý is-sharasy ótkizildi. Tórt kúnde jol erejesin óreskel buzýdyń 1 502 deregi anyqtaldy. Sonyń ishinde 12-si avtokólikti mas kúıinde júrgizgen. 29-y kólik quralyn basqarý quqyǵynan aıyrylsa da, rýlge otyrǵan. 49 júrgizýshi jolaýshylardy zańsyz tasymaldaýmen aınalysqan. Kólik júrgizýshileri árqashan muqııat bolyp, qasyndaǵy jolaýshylardyń jáne basqa da adamdardyń ómiri men densaýlyǵyna jaýapty ekenin umytpaýy tıis, - dedi N.Jalǵasov.

Eske sala keteıik, budan buryn Batys Qazaqstanda jol apatynan 8 adamnyń kóz jumǵanyn jazǵan edik.