BQO-da tórt adamnyń ómirin jalmaǵan jol apatyna qatysty qylmystyq is toqtatyldy
ORAL. QazAqparat - Bıylǵy 2 maýsym kúni Oral-Aqsaı joly boıynda qos birdeı «Folksvagen Sharan» avtokóligi betpe-bet soqtyǵysyp, sonyń saldarynan tórt adam qaza taýyp, 10-y túrli jaraqat alǵan edi. Osy oqıǵaǵa qatysty qozǵalǵan qylmystyq is bas kúdiktiniń ólimine baılanysty toqtatyldy, dep habarlaıdy «QazAqparat» tilshisi.
BQO ІІD anyqtaý basqarmasy bastyǵynyń mindetin atqarýshy Maksım Syıqovtyń málim etkenindeı, medıtsınalyq saraptama qorytyndysyna sáıkes eki júrgizýshi de ishimdik ishpegen. Sonymen qatar avtokólikterdiń tehnıkalyq jaı-kúıi de tekserildi. Jol apatyna tehnıkanyń synýy emes, Oraldan Aqsaıǵa ketip bara jatqan A.Muqash degen júrgizýshiniń avtokóligimen qarsy betke shyǵyp ketýi sebepker bolǵan. Oǵan qosa sol jerdiń oıyǵy da bolmaǵan. Júrgizýshi ne qalǵyp ketken, ne basqa bir nársege alańdaǵan syńaıly. Sonyń saldarynan ózimen birge úsh birdeı jolaýshy kóz jumdy. «Ekıpaj Batys» JShS dırektorynyń mindetin atqarýshy T.Qurmanǵalıevtiń jáne basqa jolaýshy tasymaldaıtyn kásiporyndardyń bergen deregine qaraǵanda, A.Muqash olardyń eshqaısysynda jumys jasamaǵan. Al ekinshi júrgizýshi T.Mýsın «Ekıpaj Batys» JShS-men kelisimshartqa otyrǵan.
Osylaısha, tergeý qorytyndysyna sáıkes bas kúdiktiniń ólimine baılanysty qylmystyq is toqtatyldy. Qabyldanǵan sheshim jóninde jábirlenýshilerge habar berildi. Olardyń moraldyq jáne materıaldyq zalaldy óndirý jóninde sotqa talap-aryz berýge quqyqtary bar.
