BQO-da tórt adamdy óltirgen ózbekstandyq ómir boıyna bas bostandyǵynan aıyryldy

ORAL. KAZINFORM – BQO qylmystyq ister jónindegi mamandandyrylǵan aýdanaralyq sotynda J-ǵa qatysty QR QK 99-baby 2-bóligi 1, 6-tarmaqtaryna sáıkes qylmystyq iske núkte qoıyldy.

BQO sotynyń baspasóz qyzmetinen málim etkenindeı, ótken jyldyń kókteminde 15 adam Ózbekstannan Qazaqstanǵa maýsymdyq jumysqa kelgen.

Olar baqsha daqyldaryn ósirýmen aınalysatyn sharýa qojalyǵynda jumysshy bolyp qyzmet atqarǵan. Ózderi aýyldan úsh shaqyrymdaı jerde qojalyq aýmaǵyndaǵy ýaqytsha baspanada turǵan.

Sol jyly 9 mamyrda saǵat 20.00 shamasynda J. jerlesteriniń biriniń týǵan kúnin toılap, alkogoldik ishimdik ishken. Saǵat 23.00-de olardyń arasynda kelispeýshilik týyndap, sonyń barysynda sottalýshy baltamen baspanaǵa kirip, otandastarynyń birine qaraı laqtyryp jibergen. Sodan keıin «Bárińdi óltiremin!» dep aıqaılap, 5 lıtr benzın quıylǵan plastık ydystyń qaqpaǵyn ashyp, janyp turǵan gaz plıtasyna laqtyrǵanda, órt shyqqan.

Órt saldarynan tórt adam oqıǵa ornynda kóz jumyp, taǵy bireýi termııalyq kúıik jaraqatyn alǵan. Memlekettik aıyptaýshy J-ny qylmystyq quqyq buzýshylyq jasaǵany úshin kináli dep tanyp, ómir boıyna bas bostandyǵynan aıyrýdy surady.

Jábirlenýshiler azamattyq talap qoıýdan bas tartyp, jazaǵa qatysty memlekettik aıyptaýshyny qoldady. Qorǵaý taraby J-nyń áreketin QR QK 104-babynyń 2-bóligine sáıkes abaısyzda eki nemese odan da kóp adamnyń ólimine ákep soqqan dep qaıta saralaýdy ótindi.

- Sottalýshy QR QK 99-baby 2-bóligi 1, 6-tarmaqtaryna sáıkes aıypty dep tanylyp, ómir boıyna bas bostandyǵynan aıyryldy. Ol jazasyn qaýipsizdigi tótenshe qylmystyq-atqarý júıesi mekemesinde óteıdi. Úkim zańdy kúshine endi, - dep habarlady vedomstvodan.

Eske sala keteıik, budan buryn Oralda órtengen garaj ornynan er adamnyń múrdesi tabylǵanyn jazǵan edik.