BQO-da tok soǵyp, eki qolynan aıyrylǵan balanyń oqıǵasyna úkim shyqty
Aqjaıyq aýdandyq sotynyń baspasóz qyzmetinen málim etkenindeı, Jańaqala aýdandyq elektr jelisiniń burynǵy basshysy Baýyrjan Bıgalıev QR QK 371-baby 2-bóligine (abaısyzda aýyr zardaptarǵa ákep soqqan salǵyrttyq) sáıkes aıypty dep tanyldy.
Sotta anyqtalǵanyndaı, B.Bıgalıev Jańaqala aýdandyq elektr jelisiniń basshysy bola tura, óndiris ornynyń qaýipsizdigin qamtamasyz etý jumystaryn uıymdastyrmaǵan.
Sonyń saldarynan ótken jylǵy 24 mamyrda bes jasar Amanjol Orynbekuly nysannyń (transformatordyń) qaýiptiligin túsinbeı, tozyǵy jetken qorshaýdyń sańylaýynan ótip, tokqa soǵylyp, aýyr dene jaraqatyn alǵan.
B.Bıgalıev sotta kinásin moıyndamady.
Sottalýshynyń kinási tolyq dálelin tapty jáne ol kýálardyń, kámeletke tolmaǵan jábirlenýshiniń aıǵaqtarymen, tergeý áreketteriniń hattamalary men saraptama qorytyndysymen, istiń basqa da materıaldarymen rastalady.
Aqjaıyq aýdandyq sotynyń úkimimen B.Bıgalıevke QR QK 371-baby 2-bóligine sáıkes úsh jyl merzimge elektr energetıkasy salasynda basshylyq laýazymdardy atqarý quqyǵynan aıyra otyryp, 2 jyl merzimge bas bostandyǵyn shekteý jazasy kesildi.
Jábirlenýshiniń ókili Ásel Aıtjanovanyń moraldyq zııandy óndirý týraly azamattyq talap aryzy ishinara qanaǵattandyryldy. «Batys Qazaqstan aımaqtyq jelilik kompanııasy» JShS-nen Á.Aıtjanovanyń paıdasyna 30 mln teńge moraldyq zııan óndirildi.
Úkim zańdy kúshine engen joq.
Eske sala keteıik, budan buryn Batys Qazaqstanda tok soqqan eki balanyń aýrýhanaǵa túskenin jazǵan bolatynbyz.
Keıin osy jaǵdaı boıynsha qylmystyq is qozǵaldy.
Oralda tok soǵyp, eki qolynan aıyrylǵan balanyń ata-anasyna páter berildi.
