BQO-da toǵanda úsh tonnadan astam balyq qyrylyp qaldy
ORAL. QazAqparat - Qaztalov aýdanyndaǵy Qarasý toǵanynda 3 tonnadan astam balyq qyrylyp qaldy, dep habarlaıdy QazAqparat tilshisi.
Aýdan ortalyǵy Qaztalov aýylynyń qaq ortasyn bólip turǵan toǵanda muz erisimen óli balyqtardyń jappaı jaǵaǵa shyǵý derekteri oryn aldy.
BQO orman sharýashylyǵy jáne janýarlar dúnıesi aýmaqtyq ınspektsııasy balyq sharýashylyǵy bóliminiń basshysy Qaırat Ibraevtyń aıtýynsha, tekserý kezinde jalpy salmaǵy 3 tonna 150 kg taban balyqtyń ólgeni anyqtaldy.
Parazıtologııaǵa alynǵan balyq synamasy teris nátıje kórsetti. Sonymen qatar quramynda zııandy zattar, qatty metaldar, radıologııa bar-joǵyn anyqtaý maqsatynda sanıtarlyq-hımııalyq taldaýlar júrgizý úshin sýdan da synama alyndy.
Mamannyń sózine qaraǵanda, aldyn ala málimet boıynsha balyqtardyń ólý sebebi - otteginiń jetispeýi. Naqty derek sýdan alynǵan taldama qorytyndysynan keıin belgili bolady.
Mundaı jaǵdaı 2017 jyldyń kókteminde de oryn alǵan edi.
Qys kezinde balyqtardyń qatyp qalýyna jol bermeý úshin aýyl ákimdigi turǵyndarmen jáne kommýnaldyq qyzmetter qyzmetkerlerimen birlesip, tıisti jumystar júrgizdi. 1300-deı oıyq oıyldy. Balyqqa aýa jiberý úshin qamystar da salyndy.
Qarasý toǵany balyq ósirýge arnalmaǵan ári aǵyndy sý emes. Keńes dáýirinde aýyl sharýashylyǵy jáne tehnıkalyq qajettilikterge arnalyp jasalǵan sý qoımasynyń tereńdigi 1-2 metr. Toǵannyń taıaz bolýy balyqtardyń jappaı ólýine soqtyryp otyr.
Qaztalov aýyldyq okrýginiń ákimi Júsip Shaqýovtyń málim etkenindeı, toǵannyń uzyndyǵy 4 shaqyrym bolsa, eni 75 metr shamasynda.
«Qazirgi kezde toǵandy óli balyqtan tazartý jumystary tolyqtaı júrgizildi. Aldaǵy ýaqytta mundaı jaǵdaıǵa jol bermeý úshin toǵandy tereńdetý baǵytynda jobalar jasaý oılastyrylýda», dedi QazAqparat tilshisine J.Shaqýov.
